نئی دہلی:(اردودنیا.اِن/ایجنسیاں)جھارکھنڈ اکیڈمک کونسل (جے اے سی) نے سوشل میڈیا پر امتحان کی منسوخی کی افواہوں کی تردید کرتے ہوئے کہا ہے کہ جھارکھنڈ 12 ویں بورڈ امتحان 2021 کے انعقاد سے متعلق حتمی فیصلے کا ابھی اعلان نہیں کیا گیا ہے۔ایک فرضی نوٹس سوشل میڈیا پر گردش کررہا تھا، جس میں کہا گیا ہے کہ جے اے سی نے کورونا کے پیش نظر ریاست میں کلاس 12 ویں بورڈ کے امتحانات منسوخ کرنے کا اعلان کیا ہے۔
جھارکھنڈ بورڈ نے اس نوٹس کو یہ کہتے ہوئے مسترد کردیا ہے کہ ابھی تک اس طرح کا کوئی اعلان نہیں کیا گیا ہے۔جے اے سی کا لوگو کو بھی سوشل میڈیا پر جعلی نوٹس میں شامل کیا گیا تھا، جس سے طلباء میں کافی بے چینی پیدا ہوئی تھی۔ جھارکھنڈ بورڈ کے ذریعہ امتحانات کے انعقاد کے بارے میں حتمی فیصلہ کچھ دن میں جاری کیا جائے گا۔
پورے ملک میں سی بی ایس ای اور سی آئی ایس سی ای بورڈ کے امتحانات کی منسوخی کے بعد مہاراشٹرا، کرناٹک، گوا، اڑیشہ اور مدھیہ پردیش جیسی متعدد ریاستی حکومتوں نے وبائی امراض کی وجہ سے اپنی ریاستوں میں 12ویںبورڈ کے امتحانات منسوخ کرنے کا فیصلہ کیا ہے۔
