آئی سی سی چیف بننے پر جے شاہ کے عزم کا اظہار ٹیسٹ کرکٹ شاندار ہے، میں اس کا وقار برقرار رکھوں گا

نئی دہلی،2دسمبر ( ایجنسیز ) جے شاہ جنہیں یکم دسمبر کو آئی سی سی کے نئے چیف کے طور پر منتخب کیا گیا ہے۔ انہوں نے کہا کہ ٹیسٹ کرکٹ سب سے بہتر ہے اور وہ اس کے وقار کو برقرار رکھنے کے لیے ہر ممکن کوشش کریں گے۔ عہدہ سنبھالنے کے بعد، جے شاہ نے سوشل میڈیا پلیٹ فارم پر ایک پوسٹ شیئر کی اور کہا،‘‘ٹیسٹ کرکٹ سب سے بڑا کھیل ہے اور میں اس کے وقار کو برقرار رکھنے اور اسے شائقین تک لے جانے کے لیے پرعزم ہوں۔

نئے چیئرمین نے یہ بھی کہاکہ میں آئی سی سی کے چیئرمین کا عہدہ سنبھالنے پر فخر محسوس کر رہا ہوں اور آئی سی سی کے ڈائریکٹرز اور بورڈ ممبران کی جانب سے مجھے ملنے والی حمایت اور اعتماد کے لیے بھی شکر گزار ہوں۔ ہم مل کر کرکٹ کو بے مثال بلندیوں پر لے جائیں گے، آنے والی نسل کو متاثر کریں گے اور کرکٹ کے اپنے عظیم کھیل کے ذریعے کمیونٹیز کو متحد کریں گے۔جے شاہ نے کہاکہ ہم ایک اہم موڑ پر ہیں جہاں ہمیں مختلف فارمیٹس کے بقائے باہمی کو یقینی بنانا ہے اور خواتین کی کرکٹ کی ترقی کے لئے اقدامات اٹھانے کی ضرورت ہے۔

عالمی سطح پر کرکٹ میں بے پناہ صلاحیت موجود ہے اور میں کرکٹ کو نئی بلندیوں تک لے جانے کے نئے مواقع سے فائدہ اٹھانے کے لیے آئی سی سی ٹیم اور رکن ممالک کے ساتھ کام کرنے کا منتظر ہوں۔36 سالہ شاہ اس عہدے کے لیے بلامقابلہ منتخب ہوئے تھے اور وہ اس عہدے پر فائز ہونے والے آئی سی سی کے سب سے کم عمر صدر ہیں۔ آئی سی سی کے صدر بننے سے قبل وہ بی سی سی آئی سیکرٹری کا کردار ادا کر رہے تھے۔ وہ اس سے قبل ایشین کرکٹ کونسل اور آئی سی سی کی کمرشل اور مالیاتی کمیٹی کے چیئرمین بھی رہ چکے ہیں۔

اس وقت جے شاہ کی قیادت میں آئی سی سی کے سامنے بڑا چیلنج چیمپئنز ٹرافی کے مقام کا فیصلہ کرنا ہے۔ یہ ٹورنامنٹ پاکستان میں کھیلے جانے کی تجویز ہے جو 19 فروری سے شروع ہونا ہے۔ لیکن حکومت کی جانب سے اجازت نہ ملنے کا حوالہ دیتے ہوئے بی سی سی آئی کی جانب سے پاکستان جانے سے انکار کی وجہ سے اس ٹورنامنٹ کے شیڈول کا ابھی تک اعلان نہیں کیا گیا۔اب تک، پی سی بی پورے ٹورنامنٹ کو پاکستان میں منعقد کرنے پر اٹل تھا

کیونکہ اس نے 2023 کے ون ڈے ورلڈ کپ میں شرکت کے لیے اپنی ٹیم ہندوستان بھیجی تھی۔ تاہم اس معاملے پر ایک معاہدہ طے پا سکتا ہے، جس کے تحت ہندوستان کے تمام میچز غیر جانبدار مقام پر ہوں گے۔ اس بارے میں جلد حتمی فیصلہ کیا جا سکتا ہے۔خیال رہے کہ جے شاہ برسراقتداربی جے پی کے اہم لیڈر اور مرکزی وزیر داخلہ امت شاہ کے بیٹے ہیں۔