جھارکھنڈ : دمکا میں ہسپانوی خاتون سے اجتماعی عصمت دری ، 3 افراد گرفتار

رانچی ، 2مارچ:(اردودنیانیوز.کام/ایجنسیز)جھارکھنڈ کے دمکا کے ہنس ڈیہا تھانہ علاقے میں جمعہ (1 مارچ) کی دیر رات ایک ہسپانوی خاتون کے ساتھ اجتماعی عصمت دری کی گئی۔ اس معاملے کے بارے میں دمکا کے ایس پی نے کہا کہ پولیس نے متاثرہ خاتون کی شکایت پر مقدمہ درج کر لیا ہے۔ اس کے علاوہ تین افراد کو حراست میں لے لیا گیا ہے اور طبی معائنے سمیت معاملے کی جانچ کی جا رہی ہے۔ بتایا جا رہا ہے کہ خاتون اپنے شوہر کے ساتھ بھارت کے دورے پر آئی ہے۔جرمونڈی کے سب ڈویژنل پولیس افسر سنتوش کمار نے بتایا کہ ہسپانوی خاتون کی اجتماعی عصمت دری کا واقعہ جمعہ کی رات پیش آیا۔

اس کے علاوہ انہوں نے کہا کہ باقی معلومات بعد میں دی جائیں گی۔ ایک اور افسر نے بتایا کہ جمعہ کی رات یہ جوڑا بائیک پر بنگلہ دیش سے دمکا پہنچا تھا اور بہار اور پھر نیپال جا رہا تھا۔ رات تقریباً 12 بجے، انہوں نے خیمہ لگایا اور ہنس ڈیہا بازار سے پہلے کنجی-کروماہٹ نامی جگہ پر رک گئے۔اس دوران سات سے آٹھ مقامی نوجوانوں نے خاتون کے ساتھ اجتماعی عصمت دری کی۔ افسر نے بتایا کہ اب تک تین گرفتاریاں کی جا چکی ہیں، جبکہ باقی لوگوں کی تلاش جاری ہے۔ متاثرہ کو مقامی اسپتال میں داخل کرایا گیا ہے۔

یہ مبینہ گینگ ریپ ایک ایسے دن ہوا جب وزیر اعظم نریندر مودی جھارکھنڈ میں تھے اور انہوں نے ریاست میں لا اینڈ آرڈر اور بھتہ خوری پر شدید تشویش کا اظہار کیا تھا۔اس معاملے پر بی جے پی ایم ایل اے اننت اوجھا نے کہا کہ یہ ریاست پر ایک داغ ہے۔ یہ ریاست میں امن و امان کی بگڑتی ہوئی صورتحال کو ظاہر کرتا ہے۔ انہوں نے کہا کہ ریاست میں غیر ملکی بھی محفوظ نہیں ہیں۔ پولیس کو جلد ایکشن لینا چاہیے اور حکومت کو بھی اس کا نوٹس لینا چاہیے۔ ایسے انتشار پھیلانے والوں کے خلاف سخت کارروائی کی جائے۔