جوبلی ہلز ضمنی انتخاب میں امیدواروں کی تصاویر EVM پر، الیکشن کمیشن کی نئی انتخابی اصلاحات کا اعلان

حیدرآباد:(اردودنیا.اِن/ایجنسیز) تلنگانہ کے جوبلی ہلز اسمبلی حلقے میں ہونے والے ضمنی انتخاب میں الیکشن کمیشن آف انڈیا نے ایک اہم قدم اٹھایا ہے۔ چیف الیکٹورل آفیسر (CEO) سی سدھارتھن ریڈی نے منگل کو اعلان کیا کہ 11 نومبر کو ہونے والے اس ضمنی انتخاب میں الیکٹرانک ووٹنگ مشینوں (EVMs) پر امیدواروں کی رنگین تصاویر لگائی جائیں گی۔انہوں نے بتایا کہ یہ اقدام چیف الیکشن کمشنر گیانیش کمار کی جانب سے متعارف کرائی گئی نئی انتخابی اصلاحات کے تحت کیا جا رہا ہے، جنہیں پہلی مرتبہ بہار اسمبلی انتخابات اور ملک بھر کے آٹھ اسمبلی حلقوں میں ہونے والے ضمنی انتخابات کے دوران نافذ کیا جا رہا ہے۔

ریڈی نے بتایا کہ ان اصلاحات کا مقصد ووٹرز کو آسانی فراہم کرنا، شفافیت میں اضافہ کرنا اور انتخابی عمل کو مؤثر بنانا ہے۔ نئی اصلاحات میں ہر پولنگ اسٹیشن پر ووٹروں کی زیادہ سے زیادہ تعداد کو 1200 تک محدود کرنا، ای وی ایم اور بیلٹ یونٹس پر امیدواروں کی رنگین تصاویر چسپاں کرنا اور خواتین ووٹروں کی حوصلہ افزائی کے لیے اضافی خواتین پولنگ اہلکاروں کی تعیناتی شامل ہے۔

چیف الیکٹورل آفیسر نے حکومتی محکموں کے نمائندوں کے ساتھ میٹنگ میں انتخابی تیاریوں کا جائزہ لیا اور تمام سیاسی جماعتوں سے ماڈل کوڈ آف کنڈکٹ کی سختی سے پابندی کرنے اور مکمل تعاون فراہم کرنے کی اپیل کی۔اس اہم ضمنی انتخاب کے لیے ووٹنگ 11 نومبر کو ہوگی جبکہ ووٹوں کی گنتی 14 نومبر کو کی جائے گی۔ چیف الیکشن کمشنر گیانیش کمار نے پیر کے روز نئی دہلی میں اس شیڈول کا اعلان کیا۔

واضح رہے کہ جوبلی ہلز اسمبلی سیٹ پر ضمنی انتخاب بی آر ایس (BRS) کے رکن اسمبلی مگنتی گوپیناتھ کی جون میں دل کا دورہ پڑنے سے موت کے بعد منعقد کیا جا رہا ہے۔