نئی دہلی،20جنوری:(اردودنیا.اِن/ایجنسیز) دہلی کے کانجھا والا کیس کے ملزم دیپک کھنہ کو ضمانت نہیں ملی ہے۔ عدالت نے ان کی درخواست ضمانت مسترد کر دی ہے۔ دیپک کھنہ پر ملزم کی مدد کرنے کا الزام ہے۔ اس معاملے کی شروعات میں کہا گیا تھا کہ دیپک کار چلا رہا تھا لیکن تحقیقات کے بعد پتہ چلا کہ دیپک کا بھائی امیت گاڑی چلا رہا تھا۔ اس سے پہلے ایک اور ملزم آشوتوش کو ضمانت مل چکی ہے۔تین دن قبل روہنی کی عدالت نے آشوتوش کو 50,000 روپے کے ضمانتی مچلکے پر ضمانت دی تھی۔ اس کے ساتھ عدالت نے یہ شرط بھی رکھی ہے کہ وہ عدالت کی اجازت کے بغیر دہلی نہیں چھوڑ سکتے۔
عدالت نے کہا کہ ملزم شواہد سے چھیڑ چھاڑ نہیں کر سکتا اور گواہوں سے بھی دوری برقرار رکھنے کا حکم دیا تھا۔ عدالت میں سماعت کے دوران دہلی پولیس نے بھی آشوتوش کی ضمانت کی مخالفت کی تھی لیکن عدالت نے انہیں ضمانت دے دی۔20 سالہ انجلی کو دہلی کے کنجھا والا علاقے میں کار سوار نوجوانوں نے ٹکر مار دی۔ حادثے کے بعد نوجوان کار لے کر بھاگنے لگے۔ لڑکی گاڑی کے نیچے پھنس گئی اور کئی کلومیٹر تک سڑک پر گھسیٹتی رہی۔ پولیس کے مطابق اس کی موقع پر ہی موت ہو گئی۔
گھسیٹنے کی وجہ سے اس کی ٹانگیں بھی جسم سے جدا ہوگئیں۔ پولیس نے اس معاملے میں پہلے دیپک کھنہ، امیت کھنہ، کرشنا، متھن اور منوج متل کو گرفتار کیا تھا۔ بعد میں آشوتوش اور انکش کھنہ کو گرفتار کر لیا گیا۔اس معاملے میں غفلت برتنے پر 11 پولیس اہلکاروں کو معطل بھی کیا گیا۔ ان میں 2 سب انسپکٹر، 4 اسسٹنٹ سب انسپکٹر، 4 ہیڈ کانسٹیبل اور 1 کانسٹیبل شامل ہیں۔ معطل کیے گئے پولیس اہلکاروں میں سے 6 کو پی سی آر ڈیوٹی پر اور 5 پولیس اہلکار پکٹ پر تعینات تھے۔ تحقیقاتی رپورٹ میں یہ پولیس اہلکار قصوروار پائے گئے۔
