ممبئی، ۸؍اپریل (اردو دنیا.اِن/ایجنسیز):بالی وڈ کی مقبول ترین جوڑی کرینہ کپور اور شاہد کپور کے درمیان کئی برسوں تک قائم رہنے والا رومانوی تعلق 2007 میں ختم ہوگیا تھا۔ لیکن برسوں بعد بھی ان کی کہانی شائقین کے دلوں میں تازہ ہے۔ حال ہی میں آئیفا ایوارڈز 2025 کی پریس کانفرنس کے دوران کرینہ اور شاہد کی خوشگوار ملاقات نے ایک بار پھر مداحوں کی توجہ حاصل کی۔
پرانا انٹرویو منظر عام پر
حالیہ دنوں سوشل میڈیا پر کرینہ کپور کا 2007 میں دیا گیا ایک انٹرویو وائرل ہو رہا ہے، جس میں انہوں نے شاہد سے بریک اپ کے بعد ان کے لیے اپنے جذبات کا اظہار کیا تھا۔ کرینہ کا کہنا تھا:
"میرے خیال میں شاہد کو اس وقت اپنے کیرئیر پر توجہ دینے کی ضرورت ہے۔ وہ اپنے کام سے سچی محبت کرتا ہے، اور بعض اوقات زندگی میں سب چیزیں ایک ساتھ نہیں ہو سکتیں۔”
شاہد کی اداسی پر کرینہ کا جواب
انٹرویو کے دوران میزبان نے شاہد کپور کی ممکنہ اداسی اور تنہائی پر سوال کیا، جس پر کرینہ نے مسکراتے ہوئے کہا:
"وہ ایسا نہیں لگتا، اس کے اردگرد خواتین اداکارائیں ہوتی ہیں، وہ تو لیڈیز مین سا لگتا ہے۔ اس لیے میں اس کے اداس ہونے پر کچھ نہیں کہہ سکتی۔”
بریک اپ کی وجوہات پر وضاحت
کئی حلقوں میں یہ قیاس آرائیاں کی گئیں کہ کرینہ نے شاہد کو اس لیے چھوڑا کیونکہ وہ کیرئیر میں تیزی سے کامیاب نہیں ہورہے تھے۔ اس پر کرینہ نے کہا:
"ایسا ہرگز نہیں ہے۔ میں خود ایک کامیاب عورت ہوں، مجھے کسی کامیاب مرد کی ضرورت نہیں۔ میں ایسا شخص چاہتی ہوں جو مجھ سے محبت کرے اور مجھے سمجھے۔ شاہد میں کامیاب ہونے کی مکمل صلاحیت ہے۔ میں نے ساڑھے چار سال شاہد سے محبت کی، اور اب بھی اس کے لیے دعاگو ہوں۔”
