کرناٹک الیکشن 2023: کرناٹک میں لڑائی بھاجپا اور کانگریس کے درمیان ہے: امت شاہ
سال 2022 میں سات ریاستوں میں انتخابات ہوئے، بی جے پی کو سات میں سے پانچ ریاستوں میں مکمل اکثریت حاصل ہے۔ دوسری طرف سات میں سے چھ ریاستوں میں کانگریس کا کلین سویپ ہو گیا ہے
بنگلور ، 31دسمبر :(اردودنیا.اِن/ایجنسیز) بی جے پی نے کرناٹک اسمبلی انتخابات کے لیے تیاریاں تیز کر دی ہیں۔ دریں اثنا، ہفتہ (31 دسمبر) کو مرکزی وزیر داخلہ امت شاہ نے بنگلورو میں پارٹی کے بوتھ صدر اور بوتھ لیول ایجنٹ سے خطاب کیا۔ اس دوران انہوں نے سابق سی ایم ایچ ڈی کمار سوامی کو پی ایف آئی کا حامی بتایا اور کانگریس پر بھی نشانہ لگایا۔امت شاہ نے ہفتہ کو کہا کہ انتخابات کے دوران، کانگریس نئی چیزیں لے کر آتی ہے کیونکہ کانگریس کے لیے اقتدار بدعنوانی کا ذریعہ ہے۔ جب کہ ہمارے لیے ’مبینہ طور پر‘حکومت معاشرے کے ہر فرد کو خوشی دینے کا ذریعہ ہے۔
سال 2022 میں سات ریاستوں میں انتخابات ہوئے، بی جے پی کو سات میں سے پانچ ریاستوں میں مکمل اکثریت حاصل ہے۔ دوسری طرف سات میں سے چھ ریاستوں میں کانگریس کا کلین سویپ ہو گیا ہے۔کرناٹک میں سال 2023 میں اسمبلی انتخابات ہوں گے۔وزیر داخلہ امت شاہ نے کہا کہ کرناٹک اسمبلی انتخابات میں لڑائی بی جے پی اور کانگریس کے درمیان ہے۔ امت شاہ نے یہ بھی کہا کہ یہاں (کرناٹک میں )ہم کسی کے ساتھ اتحاد نہیں کرنے والے ہیں۔ بی جے پی اکیلے الیکشن لڑے گی۔ جے ڈی ایس ہمارے ساتھ مل کر الیکشن لڑنے کی صرف افواہیں پھیلا رہی ہے۔
