بین ریاستی خبریں
کرناٹک پولیس نے مساجد کو نوٹس بھیجنا شروع کیا-’صوتی آلودگی کے اصول کی خلاف ورزی نہیں ہونی چاہیے‘
بنگلورو7اپریل:(اردودنیا.اِن/ایجنسیاں) جیسے ہی فرقہ پرست عناصرکوئی بیان دیتے ہیں ،محکمہ اس پرعمل شروع کرادیتاہے۔کرناٹک میں مساجد کو پولیس کی جانب سے لاؤڈ اسپیکر کی آواز پر نوٹس موصول ہونا شروع ہو گئے ہیں۔یہ معلوم نہیں ہوسکاہے کہ صوتی آلودگی کے اصول والانوٹس مندروں کوبھیجاگیاہے یانہیں۔
کرناٹک پولیس نے اپنے نوٹس میں مساجد سے کہا ہے کہ وہ مقررہ ڈیسیبل لیول کے ساتھ لاؤڈ اسپیکر استعمال کریں۔پولیس نے یہ قدم کچھ دائیں بازو کی تنظیموں کے دبائوپر مساجد میں لاؤڈ اسپیکر پر پابندی کی مہم شروع کرنے کے بعد اٹھایا ہے۔
تنظیموں کا کہنا ہے کہ ایسے لاؤڈ سپیکر کے استعمال سے آس پاس رہنے والوں کے لیے مشکلات پیدا ہوتی ہیں۔ذرائع نے بتایاہے کہ صرف بنگلورو میں تقریباً 250 مساجد کو پولیس نوٹس موصول ہوئی ہے۔ انہوں نے کہا کہ اس کے بعد مسجد انتظامیہ نے اس طرح کے آلات کی تنصیب شروع کردی ہے تاکہ آوازکی سطح اجازت کے اندر رہے۔
کرناٹک کے ڈائریکٹر جنرل آف پولیس (ڈی جی پی) پروین سود نے تمام پولیس کمشنروں، انسپکٹر جنرل آف پولیس اور سپرنٹنڈنٹ آف پولیس کو ہدایت دی ہے کہ وہ مذہبی مقامات، پبس، نائٹ کلبوں اور اجتماعات کے علاوہ دیگر اداروں میں آلودگی کے اصولوں کی خلاف ورزیوں کی تحقیقات کریں۔
بعض تنظیموں نے منگل کو یو ایس۔ مختلف پولیس حکام کو ایک میمورنڈم پیش کیا جس میں ان سے مساجد کے لاؤڈ اسپیکر کے غلط استعمال کی تحقیقات کرنے کی درخواست کی گئی۔ تنظیموں کا الزام ہے کہ ان کی آواز اسپتالوں، اہم سرکاری دفاتر، اسکولوں اور کالجوں جیسے پرسکون علاقوں تک بھی پہنچ رہی ہے۔
بنگلورو کی جامع مسجد کے خطیب و امام مقصود عمران نے کہاہے کہ پولیس کی طرف سے نوٹس بھیجے جانے کے بعد بنگلورو کی مساجد نے آوازکی سطح کو جائز حد میں رکھنے کے لیے آلات نصب کرنا شروع کر دیے ہیں۔
