وارانسی 15اپریل:(اردودنیا.اِن/ایجنسیاں)عدالت نے کاشی وشوناتھ-گیان واپی مسجد کیس کے سلسلے میں کمشنرکی تقرری کا فیصلہ کیا ہے۔ مقرر کردہ کمشنر 19 اپریل کو مندر-مسجد کمپلیکس کا دورہ کریں گے اور ویڈیو گرافی کریں گے۔ عدالت نے اس دوران سیکورٹی فورسز کی تعیناتی کا حکم دیا ہے، تاکہ کوئی ناخوشگوار واقعہ پیش نہ آئے۔
وارانسی ڈسٹرکٹ کورٹ نے ستمبر 2020 میں دائر درخواست کی سماعت کرتے ہوئے یہ حکم دیاہے۔ اس عرضی میں اس جگہ کو ہندوؤں کے حوالے کرنے کا مطالبہ کیا گیا ہے۔ درخواست گزاروں نے عدالت سے احاطے کے معائنے، ریڈار اسٹڈی اور ویڈیو گرافی کا حکم دینے کی مانگ کی تھی۔
درخواست گزار کا دعویٰ ہے کہ احاطے کو ہندو دیوتاؤں کے حوالے کیا جانا چاہیے۔ یہ سن کر عدالت نے کمشنر مقرر کر دیا ہے۔گیان واپی مسجد کے بارے میں ہندو فریق کا دعویٰ ہے کہ اس ڈھانچے کے نیچے ایک جیوترلنگ ہے۔
یہی نہیں، اس ڈھانچے کی دیواروں پر دیوتاؤں کی تصویریں بھی آویزاں ہیں۔ یہ دعویٰ کیا جاتا ہے کہ کاشی وشوناتھ مندر کو 1664 میں اورنگ زیب نے تباہ کر دیا تھا۔ پھر اس کی باقیات سے مندر کی زمین کے ایک حصے پر ایک مسجد بنائی گئی، جسے گیان واپی مسجد کے نام سے جانا جاتا ہے۔
