کویت سٹی:(اردودنیا.اِن/ایجنسیاں) خلیجی ملک کویت، جو پہلے ہی تارکین وطن کے لیے کئی سخت قوانین سے نبرد آزما ہے، ایک اور سنسنی خیز فیصلے کی جانب قدم بڑھا رہا ہے۔ ملک کی تکنیکی کمیٹی نے حال ہی میں سفارش کی ہے کہ دس سال سے زیادہ پرانی تارکین وطن کی گاڑیوں پر پابندی لگا دی جائے۔ بتایا جاتا ہے کہ یہ ٹیکنیکل کمیٹی ٹریفک مسائل کے حل کے لیے بنائی گئی ہے۔ کمیٹی نے تصدیق کی ہے کہ ملک میں 10 سے 20 سال پرانی کیٹیگری میں پہلے ہی سیکڑوں کاریں موجود ہیں۔ میڈیا نے کہا کہ کمیٹی کی رائے ہے کہ یہ گاڑیاں شدید فضائی آلودگی، سڑک حادثات اور ٹریفک جام کا باعث بن رہی ہیں۔
کمیٹی نے کہا کہ اس طرح کی گاڑیوں کے ایندھن کی کھپت بھی زیادہ ہے۔ اور ٹیکنیکل کمیٹی کی طرف سے دی گئی رپورٹ کے ذریعے پتہ چلا ہے کہ اس زمرے سے تعلق رکھنے والی کاریں زیادہ تر متوسط اور نچلے درجے کے غیر ملکی کارکنوں کی ہیں۔ کویتی میڈیا نے انکشاف کیا کہ یہ سفارش انوائرمنٹ پبلک اتھارٹی کی جانب سے کیے گئے سابقہ مطالبات کے مطابق ہے، جس میں کویت میں پرانی گاڑیوں سے پیدا ہونے والی آلودگی کے مسئلے کو حل کرنے پر زور دیا گیا تھا۔
