قومی خبریں
لکھیم پور کھیری تشدد: مہلوکین کسانوں کے اہل خانہ بھی آشیش مشرا کی ضمانت کے خلاف سپریم کورٹ پہنچے
نئی دہلی،21؍ فروری:(اردودنیا.اِن/ایجنسیاں) لکھیم پور کھیری معاملے میں اب کسانوں کے متاثرہ خاندان بھی سپریم کورٹ پہنچ گئے ہیں۔ ان لوگوں نے مرکزی وزیر اجے مشرا ٹینی کے بیٹے آشیش مشرا کو ضمانت دینے کے فیصلے کو بھی چیلنج کیا ہے۔ الہ آباد ہائی کورٹ نے مشرا کو ضمانت دینے کا فیصلہ دیا تھا۔
کار سے کچلے گئے مہلوک کسانوں کے اہل خانہ کی جانب سے ایڈوکیٹ پرشانت بھوشن کے توسط سے دائر درخواست میں کہا گیا ہے کہ متاثرہ خاندان سپریم کورٹ سے رجوع کرنے پر مجبورکیا گیا ہے کیونکہ اتر پردیش حکومت ہائی کورٹ کے فیصلے کے خلاف اپیل دائر کرنے میں ناکام رہی ہے۔ درخواست میں کہا گیا ہے کہ ہائی کورٹ نے ضمانت دیتے ہوئے مشرا کے خلاف ٹھوس شواہد پر غور نہیں کیا کیونکہ ان کے خلاف چارج شیٹ ریکارڈ میں نہیں لایا گیا تھا۔
ہائی کورٹ نے جرم کی گھناؤنی نوعیت، چارج شیٹ میں ملزم کے خلاف ٹھوس شواہد، متاثرہ اور گواہوں کے حوالے سے ملزم کے موقف کے امکان پر غور کیے بغیر ضمانت منظور کر لی تھی۔ ملزم انصاف سے بھاگ رہا ہے اور جرم کو دہرا رہا ہے اور گواہوں سے چھیڑ چھاڑ کرنے اور انصاف کی راہ میں رکاوٹ ڈالنے کا خدشہ ہے۔
درخواست میں یہ بھی کہا گیا کہ متاثرین کو متعلقہ مواد ہائی کورٹ کے نوٹس میں لانے سے روکا گیا کیونکہ ان کے وکلاء نے 18 جنوری 2022 کو ضمانت کیس کی سماعت سے دستبردار ہو گئے تھے۔ درخواست میں کہا گیا کہ وکلاء مشکل سے کوئی دلائل دے سکے اور عدالتی عملے کو دوبارہ رابطہ کرنے کے لیے بار بار کال کرنے کا کوئی فائدہ نہیں ہوا اور متاثرین کی جانب سے ہائی کورٹ میں موثر سماعت کے لیے دائر درخواست خارج کر دی گئی۔
بتا دیں کہ اس سے قبل ملزم آشیش مشرا کی ضمانت کو چیلنج کرنے والی ایک اور درخواست دائر کی گئی ہے۔ درخواست گزار وکلاء شیو کمار ترپاٹھی اور سی ایس پانڈا نے سپریم کورٹ میں درخواست دائر کی ہے۔ کسانوں کو اپنی جیپ سے کچلنے کے ملزم آشیش مشرا کو الہ آباد ہائی کورٹ کی لکھنؤ بنچ سے ضمانت مل گئی تھی۔ مشرا کو لکھیم پور کھیری تشدد کیس میں گرفتار کیا گیا تھا۔ اس معاملے میں اتر پردیش کی ایس آئی ٹی نے 5000 صفحات کی چارج شیٹ داخل کی تھی۔
