آنجہانی سابق وزیراعظم راجیو گاندھی کی سالگرہ: راہل گاندھی پہنچے ویربھومی، مودی- کھرگے نے پیش کیا خراج عقیدت

نئی دہلی،20اگست :(اردودنیانیوز.کام/ایجنسیز)آج (20 اگست) ملک کے سابق وزیر اعظم راجیو گاندھی کی یوم پیدائش ہے۔ اس موقع پر لوک سبھا میں قائد حزب اختلاف راہل گاندھی انہیں خراج عقیدت پیش کرنے کے لیے اپنے آنجہانی والد راجیو گاندھی کے سمادھی ویر بھومی پہنچے۔ یہاں انہوں نے شدید بارش کے درمیان اپنے مرحوم والد کو خراج عقیدت پیش کیا۔ اس دوران رابرٹ واڈرا بھی راہل گاندھی کے ساتھ رہے۔ اس موقع پر کانگریس کے کئی رہنما ان کے ساتھ موجود تھے۔خیال رہے کہ اپنی والدہ وزیر اعظم اندرا گاندھی کے قتل کے بعد راجیو گاندھی نے 1984 میں کانگریس پارٹی کی باگ ڈور سنبھالی تھی۔ وہ اکتوبر 1984 میں 40 سال کی عمر میں ہندوستان کے سب سے کم عمر وزیر اعظم بنے تھے۔

وہ 2 دسمبر 1989 تک وزیر اعظم کے عہدے پر فائز رہے۔ 21 مئی 1991 کوراجیو گاندھی کو لبریشن ٹائیگرز آف تامل ایلم (ایل ٹی ٹی ای) کے ایک رکن نے سری پیرمبدور، تمل ناڈو میں ایک انتخابی ریلی کے دوران قتل کر دیا۔کانگریس صدر ملکارجن کھرگے نے بھی سابق وزیر اعظم راجیو گاندھی کو خراج عقیدت پیش کرتے ہوئے سوشل میڈیا پر لکھاکہ آج ملک خیر سگالی کا دن منا رہا ہے۔ سابق وزیر اعظم راجیو گاندھی ہندوستان کے عظیم فرزند تھے۔ انہوں نے کروڑوں ہندوستانیوں میں امید کی کرن جگائی اور اپنی بے مثال شراکت سے ہندوستان کو 21ویں صدی میں لائے۔ ووٹنگ کی عمر کو 18 سال تک کم کرنے، پنچایتی راج کو مضبوط کرنے، ٹیلی کام اور آئی ٹی انقلاب، کمپیوٹرائزیشن پروگرام، مسلسل امن معاہدے، خواتین کو بااختیار بنانے، عالمی ویکسی نیشن پروگرام اور جامع تعلیم پر زور دینے والی نئی تعلیمی پالیسی جیسے ان کے بہت سے خوش کن اقدامات ملک میں تبدیلی لانے والے ہیں۔

ہم بھارت رتن راجیو گاندھی جی کو ان کی یوم پیدائش پر دل کی گہرائیوں سے خراج عقیدت پیش کرتے ہیں۔وہیںسابق وزیر اعظم راجیو گاندھی کو خراج عقیدت پیش کرتے ہوئے پی ایم مودی نے سوشل میڈیا پر لکھا، ہمارے سابق وزیر اعظم شری راجیو گاندھی کو ان کی یوم پیدائش پر خراج عقیدت پیش ہے۔