آبکاری گھوٹالہ: سیسودیا کو نہیں ملی راحت، عدالتی حراست میں 14 دنوں کی توسیع

نئی دہلی، 20مارچ :(اردودنیانیوز.کام/ایجنسیز)دہلی آبکاری گھوٹالہ معاملے میں سابق نائب وزیر اعلیٰ منیش سیسودیا کو ایک بار پھر راؤز ایونیو کورٹ نے جھٹکا دیا ہے۔ آبکاری کیس میں عدالت نے سی بی آئی والے معاملہ پر منیش سیسودیا کی 14 دنوں کی عدالتی حراست بڑھانے کا فیصلہ سنایا ہے۔ یعنی سیسودیا آئندہ 3 اپریل تک عدالتی حراست میں ہی رہیں گے۔قابل ذکر ہے کہ منیش سیسودیا فی الحال ای ڈی کی حراست میں ہیں۔ سی بی آئی کیس میں عدالتی حراست ختم ہونے پر آج انھیں ویڈیو کانفرنسنگ کے ذریعہ عدالت میں پیش کیا گیا۔ سماعت کے دوران سی بی آئی نے کہا کہ جانچ اب بھی جاری ہے اور اہم موڑ پر ہے۔

سی بی آئی کی باتیں سننے کے بعد عدالت نے منیش سیسودیا کی عدالتی حراست میں 14 دنوں کی توسیع کرنے کا فیصلہ سنایا۔واضح رہے کہ منیش سیسودیا 22 مارچ تک ای ڈی کی حراست میں ہیں۔ اس معاملے میں راؤز ایونیو کورٹ نے گزشتہ جمعہ کے روز منیش سیسودیا کی ریمانڈ 22 مارچ تک کے لیے ای ڈی کو دے دی تھی۔ ای ڈی نے کورٹ میں کہا تھا کہ لیفٹیننٹ گورنر نے جب اس معاملے کی شکایت کی تھی تو سیسودیا نے اپنا فون بدل لیا تھا لیکن ایجنسی نے ان کے موبائل ڈاٹا کو پھر نکال لیا ہے۔ اب ایجنسی ان کے موبائل اور ای میل سے نکالے گئے ڈاٹا کا اینالیسس کر رہی ہے اور ابھی سیسودیا سے سوال پوچھنے ہیں۔