لائبریری کو 50 برس بعد کتاب واپسی، ردی کی ٹوکری میں نہ پھینکنے کا مطالبہ

لندن ،4اپریل:(اردودنیا.اِن/ایجنسیاں)جو لوگ لائبریری سے کتابیں لیتے ہیں، انہیں معلوم ہے کہ کتاب ایک مدت کے بعد واپس کرنی ہوتی ہے اور اگر ایسا نہ کیا جائے تو جرمانہ ادا کرنا پڑتا ہے، لیکن بعض لوگ ایسے بھی ہیں جو کتاب واپس ہی نہیں کرتے۔

کچھ ایسا ہی واقعہ برطانیہ میں پیش آ یا جہاں ایک نامعلوم شخص نے یونیورسٹی کالج لندن (یو سی ایل) کی لائبریری کو 50 برس کے بعد ڈاک کے ذریعہ کتاب واپس بھجوائی ہے، اور اس کے ساتھ ایک خط بھی موجود ہے۔

تحریر میں لکھا ہے کہ ’ڈیئر لائبریرین، یہ کتاب 50 برس تک واپس نہیں کی گئی۔ مہربانی فرما کر اسے ردی کی ٹوکری میں نہ پھینک دیں، کیونکہ اب یہ نوادرات میں شامل ہو چکی ہے۔برطانوی اخبار ایوننگ سٹینڈرڈ کے مطابق یہ کتاب ایک ڈرامے ’کیورولس‘ کا 1875 کا ایڈیشن ہے جسے 1974 کے موسم گرما میں یونیورسٹی کالج لندن لائبریری کو واپس کیا جانا تھا۔

یونیورسٹی کی لائبریرین سوزین ٹراؤس کا کہنا ہے کہ یہ کتاب اور اس پر لکھی تحریر کو دیکھ کر وہ دنگ رہ گئیں۔سوزین ٹراؤس کے مطابق ’10 پینس فی دن کے حساب سے اس کتاب پر ایک ہزار 254 برطانوی پاؤنڈز جرمانہ بنتا ہے۔