ممبئی ؍امراوتی: (اردودنیا.اِن) مہاراشٹرا کے امراوتی ضلع میں 8 مارچ تک لاک ڈاؤن بڑھا دیا گیا ہے۔ اس سے قبل ضلع میں یکم مارچ تک لاک ڈاؤن کا فیصلہ کیا گیا تھا، لیکن کرونا کے معاملے نہ روکنے کی وجہ سے لاک ڈاؤن میں اضافہ کرنے کا فیصلہ کیا گیا ہے۔ اس کے علاوہ آکولہ ، اکوٹ اور مرجتا پور میں بھی لاک ڈاؤن میں توسیع کردی گئی ہے۔
ضلعی انتظامیہ کے عہدیداروں نے بتایا کہ 5 اور 6 مارچ کو صورتحال کا جائزہ لیا جائے گا۔ اس کے بعد لاک ڈاؤن نافذ کرنے یا نہ کرنے کے بارے میں فیصلہ لیا جائے گا۔ کورونا وائرس کی دوسری لہر نے ملک بھر میں تشویش پیدا کردی ہے۔
پچھلے 24 گھنٹوں کے دوران 16 ہزار سے زیادہ کیس رپورٹ ہوئے ہیں۔ یہ لگاتار تیسرے دن ہوا ہے ، جب کورونا کے 16 ہزار سے زیادہ نئے کیس سامنے آئے ہیں۔ملک میں کورونا وائرس کے واقعات کی تعداد بڑھ کر 11079979 ہوگئی ہے۔ اس کے ساتھ ہی وزارت صحت نے کورونا انفیکشن سے نمٹنے کے لئے ہدایات میں 31 مارچ تک توسیع کردی ہے۔
وزارت صحت نے ہفتے کی صبح بتایا کہ پچھلے 24 گھنٹوں کے دوران ملک بھر میں کورونا انفیکشن کے 16488 نئے کیس رپورٹ ہوئے ہیں۔ امریکہ کے بعد ہندوستان دوسرا ملک ہے جہاں کورونا کے سب سے زیادہ معاملات رپورٹ ہوئے ہیں۔
