ممبئی ،28 ؍دسمبر:(اردودنیا.اِن/ایجنسیاں) کورونا وائرس کے نئے قسم اومیکرون کے تیزی سے پھیلنے کے درمیان ملک میں ایک بار پھر کورونا انفیکشن کے کیسز بڑھنے لگے ہیں۔ نیز کئی سیاستدانوں کے متاثر ہونے کی خبریں بھی آنا شروع ہو گئی ہیں۔
منگل کو مہاراشٹر کی اسکول ایجوکیشن منسٹر ورشا گائیکواڑ کے کووڈ پازیٹیو ہونے کی خبر آئی ہے۔ گائیکواڑ نے آج ایک ٹویٹ کے ذریعے بتایا کہ وہ کورونا وائرس سے متاثر ہیں۔ گائیکواڑ گزشتہ سال بھی اس وائرس سے متاثر ہوئی تھیں۔انہوں نے اپیل کی ہے کہ جو لوگ گزشتہ کچھ دنوں سے میرے رابطے میں آئے ہیں وہ احتیاط کے طور پر اپنا ٹیسٹ کروائیں۔یہ تشویشناک بات ہے کہ گائیکواڑ کل ہی ریاستی مقننہ کے جاری سرمائی اجلاس میں حصہ لے رہی تھیں۔
انہوں نے پیر کو ریاستی قانون ساز کونسل میں اپنی وزارت سے متعلق مختلف سوالات کے جوابات دیئے۔ کانگریس لیڈر گائیکواڑ نے حال ہی میں اتر پردیش کا دورہ بھی کیا تھا۔اگر ہم مہاراشٹر میں اومیکرون اور کورونا کے کل انفیکشن کی بات کریں تو مہاراشٹر میں اومیکرون کے سب سے زیادہ 167 کیسز ہیں۔
ہندوستان کی 21 ریاستوں اور مرکز کے زیر انتظام علاقوں میں اومیکرون کے 653 معاملے سامنے آئے ہیں۔ پیر کو مہاراشٹر میں کورونا وائرس کے کل 1,426 نئے کیس رپورٹ ہوئے اور 21 مریضوں کی موت ہوئی تھی۔
24 گھنٹوں میں 21 مریضوں کی موت کے بعد اموات کی تعداد بڑھ کر 1,41,454 ہو گئی اور 1426 نئے کیسز سامنے آنے کے بعد اب متاثرین کی تعداد 66,59,314 ہو گئی ہے۔
