میرٹھ قتل کیس: 7 دن بعد ملا ,دیپک تیاگی کا سر پولیس کا دعویٰ ،ناجائز تعلقات کی وجہ سے مقتول کا قتل ہوا

میرٹھ ، 3اکتوبر:(اردودنیا.اِن/ایجنسیاں)میرٹھ قتل کیس میں پولیس نے 7 دن بعد لاش کا سر برآمد کیا ہے۔ منگل (27 ستمبر) کی صبح میرٹھ کے کھجوری گاؤں کے کھیتوں میں ایک سر کٹی ہوئی لاش ملی۔ بعد میں نعش کی شناخت گاؤں کے رہنے والے دیپک تیاگی کے طور پر کی گئی۔ اس کے بعد پولیس نے دیپک کے اہل خانہ کے بیان کی بنیاد پر مقدمہ درج کر کے تفتیش شروع کی۔ ایس ایس پی روہت سنگھ سجوان نے بتایا کہ ابتدائی طور پر پولیس تفتیش کرتی رہی لیکن وہ اس کا سر نہیں ڈھونڈ سکی۔ اس کے بعد 5 ٹیمیں تشکیل دی گئیں اور تقریباً ایک ہفتے کی تفتیش کے بعد گنے کے کھیت سے ہی سر برآمد کرلیا گیا۔ اس کے ساتھ ہی مقدمے میں ملزمان فہمید اور آصف کو گرفتار کر لیا گیا۔

اس نے بتایا کہ پوچھ گچھ کے دوران فہمید نے انکشاف کیا کہ دیپک کے اس کی شادی شدہ بیٹی سے ناجائز تعلقات تھے اور اس نے دونوں کو کئی بار ایک ساتھ دیکھا تھا۔ اس کے بعد اس نے اپنی بیٹی کو سمجھایا لیکن انکار کے بعد بھی وہ دیپک سے مسلسل مل رہی تھی، اسی وجہ سے اس نے اپنے دوست آصف کے ساتھ مل کر دیپک کا قتل کردیا۔پولیس کا کہنا ہے کہ فہمید اپنے دوست آصف کو اپنے ساتھ لے گیا۔ اس نے دیپک کو کھیت کے قریب پایا جو نشے میں تھا۔

ایسے میں فہیم اور آصف نے موقع دیکھ کراسے قتل کردیا ۔اس کے بعد دونوں نے نعش کھیت میں چھوڑ دی اور پھر سر بوری میں ڈال کر کچھ فاصلے پر زمین میں گاڑ دیا اور فرار ہو گئے۔ساتھ ہی خاندان والے بھی اس بات کو قبول نہیں کر رہے ہیں۔ دیپک کے والد نے کہا کہ اگر ملزمان کو سات دن تک حراست میں رکھا گیا تو سر تلاش کرنے میں اتنا وقت کیوں لگا؟

انہوں نے سی بی آئی انکوائری کا بھی مطالبہ کیا ہے۔پولیس کا کہنا ہے کہ اس قتل کے پیچھے کوئی سازش نہیں ہے۔ تحقیقات میں پتہ چلا کہ دیپک کا قتل ناجائز تعلقات کی وجہ سے ہوا ہے تاہم اب ہم ملزم کے نارکو اور جھوٹ پکڑنے والے ٹیسٹ کے لیے عدالت میں درخواست دائر کریں گے تاکہ کوئی اور محرک بھی سامنے آسکے۔