کولکاتہ:(اردودنیا.اِن/ایجنسیز)مغربی بنگال کے دارالحکومت کولکاتہ میں ایک افسوسناک واقعہ سامنے آیا ہے۔ ریاست کے معروف ایس ایس کے ایم میڈیکل کالج اور اسپتال کے احاطے میں ایک 15 سالہ لڑکی کے ساتھ جنسی زیادتی کا معاملہ رپورٹ ہوا ہے۔ پولیس نے کارروائی کرتے ہوئے ایک نوجوان کو گرفتار کر لیا ہے۔
پولیس کے مطابق یہ واقعہ بدھ کی سہ پہر اسپتال کے کیمپس میں پیش آیا، جس کے فوراً بعد شکایت درج کر کے ملزم کو رات میں ہی گرفتار کر لیا گیا۔ اس کے خلاف پاسکو ایکٹ 2012 (Protection of Children from Sexual Offences Act) کی مختلف دفعات کے تحت مقدمہ درج کیا گیا ہے۔ ملزم کو جمعرات کے روز کولکاتہ کی نچلی عدالت میں پیش کیا گیا۔
اگرچہ پولیس نے تفتیش کے دوران ملزم کی شناخت ظاہر کرنے سے گریز کیا ہے، لیکن ذرائع کے مطابق وہ کولکاتہ کے این آر ایس میڈیکل کالج اور اسپتال میں کنٹریکٹ ملازم ہے۔ بتایا جاتا ہے کہ ملزم ماضی میں ایس ایس کے ایم اسپتال سے منسلک رہا ہے اور وہاں اکثر آتا جاتا تھا۔
تحقیقات سے پتہ چلا ہے کہ ملزم نے خود کو ڈاکٹر ظاہر کیا اور علاج کے لیے آئی ہوئی لڑکی کو ٹراما سینٹر کے بیت الخلاء میں لے گیا، جہاں اس نے مبینہ طور پر زیادتی کی کوشش کی۔ لڑکی صدمے کی حالت میں بیت الخلاء سے باہر نکلی اور اپنے والدین کو واقعے کی اطلاع دی، جس کے بعد بھوانی پور تھانے کو خبر دی گئی۔ پولیس نے فوری کارروائی کرتے ہوئے ملزم کو حراست میں لے لیا۔
یہ معاملہ اسپتال کی سیکیورٹی پر سنگین سوالات کھڑا کر رہا ہے، کیونکہ ایک غیر متعلق شخص اسپتال کے حساس حصے میں کیسے آزادانہ داخل ہو سکا۔
قابلِ ذکر ہے کہ اسی ہفتے کے آغاز میں بھی ایک الگ واقعے میں مغربی بنگال پولیس کے ایک ٹریفک ہوم گارڈ کو ہاوڑہ ضلع کے البیریا سرکاری اسپتال میں ایک خاتون جونیئر ڈاکٹر پر حملے اور زیادتی کی دھمکی دینے کے الزام میں گرفتار کیا گیا تھا۔
یہ دو متواتر واقعات نہ صرف ریاستی اسپتالوں کی سیکیورٹی پر سوال اٹھا رہے ہیں بلکہ خواتین کی سلامتی کے حوالے سے تشویش میں مزید اضافہ کر رہے ہیں۔
