منی لانڈرنگ کیس: مہاراشٹر ا کے سابق وزیر داخلہ انیل دیشمکھ کی حراست میں توسیع کا مطالبہ

ممبئی ،06؍ نومبر:(اردودنیا.اِن/ایجنسیاں)انفورسمنٹ ڈائریکٹوریٹ (ای ڈی) منی لانڈرنگ کیس میں گرفتار مہاراشٹرا کے سابق وزیر داخلہ انیل دیشمکھ کی تحویل میں توسیع کا مطالبہ کرے گا۔ دیشمکھ کو اس ہفتے کے شروع میں گرفتار کیا گیا تھا۔ دیشمکھ کے حراست کی مدت آج ختم ہو رہی ہے۔

پی ایم ایل اے عدالت میں پیش کرنے سے پہلے انہیں آج صبح معمول کے مطابق میڈیکل چیک اپ کے لیے عدالت لے جایا گیا۔ذرائع نے بتایا کہ دیشمکھ تحقیقات میں تعاون نہیں کر رہے ہیں۔ ذرائع نے یہ بھی بتایا کہ سابق وزیر اور ان کے خاندان نے غلط طریقے سے حاصل کیے گئے اثاثوں کو سفید کرنے کے لیے 27 کمپنیوں کا استعمال کیا اور ایجنسی کو ان سے شواہد کے ساتھ پوچھ گچھ کے لیے مزید وقت درکار ہے۔

ذرائع نے مزید بتایا کہ دیش مکھ کے بیٹے رشی کیش کو جمعہ کو اس کیس کے سلسلے میں پوچھ گچھ کے لیے طلب کیا گیا تھا، لیکن وہ حاضر نہیں ہوئے۔ پیر کو دوبارہ سمن جاری کیا جائے گا۔

ممبئی کے سابق اعلیٰ پولیس افسر پرمبیر سنگھ نے مہاراشٹر کے سابق وزیر داخلہ انیل دیشمکھ پر بدعنوانی اور بھتہ خوری کا الزام لگایا ہے۔ پرمبیر سنگھ بھی اس وقت مفرور ہیں۔ سینئر پولیس افسر کو بھی ایسے ہی الزامات کا سامنا ہے۔