یکم مارچ سے تمام اسکولوں کو بند کرنے کا فیصلہ

ممبئی:وزیر تعلیم ورشا گائیکواڑ نے آج یہاں میڈیا سے بات کرتے ہوئے کہاکہ مہاراشٹر بھر میںکورونا کی سنگین صورتحال کے پیش نظر ممبئی سمیت ریاست کے تمام اضلاع کے شہر، گائوں اور دیہاتوں میں موجود اسکولوں کو یکم مارچ سے بند کرنے کا اختیار مقامی بلدیاتی اداروں اور متعلقہ ایجوکیشن ڈپارٹمنٹ کو دیا گیا ہے۔

اسکولوں کو بند کرنے سے پہلے تمام کلاس روم کو سینی ٹائز کرنے کا حکم

میڈیا سے بات کرتے ہوئے ورشا گائیکواڑ نے کہاکہ تقریبا ایک مہینہ قبل ۲۷؍ جنوری سے ریاست بھر میں ۵؍ تا ۸؍ ویں جماعت تک کی اسکولوں کو شروع کرنے کی اجازت دی گئی تھی لیکن حال ہی میں جب ان تمام اسکولوں کو جائزہ لیا گیا تو معلوم ہوا کہ نان ٹیچنگ اسٹاف کے علاوہ اساتذہ کے ساتھ ساتھ کئی طلباء بھی کورونا سے متاثر ہیں جبکہ ان میں بیشتر احتیاطی طور پر جہاں ’ ہوم کورونٹائن‘ ہیں وہیں کچھ متاثرین مقامی سرکاری اسپتال میں زیر علاج ہیں

جہاں ان کی حالات پہلے سے بہتر ہے لیکن چونکہ طلباء اور اساتذہ کا تحفظ ہماری اولین ترجیحات میںشامل ہے،۔ اس تناظرکو مد نظررکھ کر موجودہ صورتحال پر سنجیدگی سے غور وخوض کرنے کے بعد یکم مارچ سے اسکولوں کو مکمل طور پر بند کرنے کا فیصلہ لیا گیا ہے۔

اس کے ساتھ ہی متعلقہ ایجوکیشن ڈپارٹمنٹ کو ہدایت دی گئی ہے کہ وہ اسکولوں کو بندکرنے سے پہلے تمام کلاسوں کو صاف صفائی کے علاوہ ہر کلاس روم کو سینی ٹائز کرنے کی ہدایتیں جا ری کریں۔ورشا گائیکواڑ نے مزید بتایا کہ ہم نے تمام اضلاع کے ایجوکیشن افسران کو ہدایت دی ہے کہ وہ وقتاً فوقتاً صورتحال کا جائزہ لے کر ہی اپنی رپورٹ ریاستی سرکار کو ارسال کرتے رہیں۔