انسانیت کی مثال! کشمیری پنڈت کی آخری رسومات ادا کرنے میں مسلمانوں نے کی مدد

اونتی پورہ، 28فروری :(اردودنیا.اِن/ایجنسیز)پلوامہ ضلع میں ملی ٹینٹوں کے ہاتھوں جان گنوانے والے کشمیری پنڈت کے مسلمان پڑوسیوں نے پیر کو اس کی آخری رسومات ادا کرنے میں اہل خانہ کی مدد کر کے انسانیت کی مثال پیش کی۔ خبررساں ایجنسی کشمیر نیوز آبزرور (کے این او) نے اطلاع دی کہ مسلمان پڑوسی مہلوک سنجے شرما کی آخری رسومات ادا کرنے میں مدد کے لئے جمع ہوئے تھے۔خیال رہے کہ سنجے شرما (42) اچن علاقے میں ایک بینک گارڈ کے طور پر تعینات تھا، جسے اتوار کو ان کی رہائش گاہ کے باہر ملی ٹینٹوں نے قتل کر دیا۔ رپورٹ کے مطابق اچن گاوں میں سنجے شرما کا خاندان واحد کشمیری پنڈت خاندان ہے اور ان کے مسلم دوستوں اور پڑوسیوں نے ان کی آخری رسومات ادا کرنے میں ہر ممکن مدد فراہم کی۔۔

ایک عہدیدار نے تصدیق کرتے ہوئے بتایا کہ 40 سالہ سنجے شرما کی آخری رسومات مقامی مسلمانوں سمیت ان کے رشتہ داروں اور پڑوسیوں نے ہندو رسم و رواج کے مطابق ادا کیں۔ مقامی مدثر احمد نے میڈیا کو بتایا (سنجے اور ہم ایک تھے۔ ہم نے انہیں کبھی پنڈت کے طور پر نہیں دیکھا۔ احمد نے سنجے کے ساتھ اپنی دوستی اور ساتھ گزارے گئے لمحات کو یاد کرتے ہوئے کہا کہ ہم ایک بندھن سے بندھے ہوئے ہیں جو سینکڑوں سال قدیم ہے۔ جب ہم نے اس بری خبر کو سنا تو ہم بھی غمزدہ خاندان کی ہمت بندھانے کے لئے دوڑے اور جو ممکن ہو سکتا تھا وہ مدد کی۔

خیال رہے کہ سنجے شرما پر پلوامہ کے اچن میں واقع ان کی رہائش سے صرف 100 میٹر کے فاصلے پر ملی ٹینٹوں نے حملہ کیا۔ اس سال کشمیر میں اقلیتی برادری کے کسی رکن پر یہ پہلا حملہ ہے۔ پچھلے سال ملی ٹینٹوں نے وادی میں 29 حملوں میں 3 کشمیری پنڈتوں، راجستھان کے ایک بینک مینیجر اور 8 غیر مقامی مزدوروں سمیت 18 افراد کو گولی مار کر ہلاک کر دیا تھا۔دریں اثنا، وزیر اعظم کے پیکیج کے درجنوں کشمیری پنڈت ملازمین نے پیر کو وادی سے باہر آباد کاری کے اپنے مطالبے کو دہراتے ہوئے احتجاج بھی کیا۔

سنجے شرما کا قتل، انسانیت اور کشمیریت کے نام پردھبہ :کشمیری عوام

 سنجے شرما کے قتل پر کشمیری مسلمانوں کو بھی تکلیف پہنچی ہے اور وہ اسے انسانیت کے خلاف سمجھ رہے ہیں۔ سید محمد لطیف، گاؤں مٹیریگام کے رہنے والے ہیں۔بتاتے ہیں کہ انہیں اتوار کو جنوبی کشمیر کے پلوامہ کے پڑوسی گاؤں اچین میں رہنے والے ایک ہندو سنجے شرما پر دہشت گردانہ حملے کے بارے میں تقریباً فوراً ہی پتہ چلا۔ 48 سالہ سماجی کارکن نے کہا کہ اس خبر نے مجھے ہلاکر رکھ دیا۔لطیف نے بتایا کہ وہ یہ سمجھنے میں ناکام ہیں کہ انسان اپنے ساتھی انسان کو مارنے کا سوچ بھی کیسے سکتا ہے۔ یہ اسلام کے بنیادی اصولوں کے خلاف ہے۔ اس کی وضاحت کے لیے انہوں نے حضرت محمد صلی اللہ علیہ وسلم کی زندگی کا ایک واقعہ سنایا۔

ایک دن کسی نے نبی کریم صلی اللہ علیہ وسلم سے پوچھا کہ کیا چوہے کو مارنا ٹھیک ہے؟ انہوں نے جواب دیا کہ اگرچہ چوہا ایک نقصان دہ مخلوق ہے اگر تم اسے چھوڑ دو گے تو مجھے لگے گا کہ تم نے پنجرے سے آزاد کر دیا ہے۔ایک اور روایت کے مطابق ایک مرتبہ نبی کریم صلی اللہ علیہ وسلم مکہ مکرمہ کے قریب طائف نامی جگہ سے گزر رہے تھے کہ مقامی لوگوں نے آپ پر پتھر برسائے۔ اس سے بری طرح زخمی ہوگئے اور خون بہنے لگا۔ جب فرشتہ جبرائیل علیہ السلام آسمان سے نمودار ہوئے اور حضرت محمد صلی اللہ علیہ وسلم سے پوچھا کہ آپ کہیے اس بستی کو تباہ کر دیں جہاں سے آپ پر پتھر برسائے گئے؟ تو آپ نے جواب دیاکہ میں یہاں ان کے لئے دعائیں کرنے آیا ہوں۔میں تمہیں ان لوگوں کو تباہ کرنے کی اجازت نہیں دوں گا۔