نیتن یاہو اگلے ہفتے واشنگٹن میں ٹرمپ سے ملاقات کر سکتے ہیں:امریکی حکام

واشنگٹن،28جنوری :(اردودنیا.اِن/ایجنسیز)امریکی حکام نے کہا ہے کہ اسرائیلی وزیر اعظم بینجمن نیتن یاہو اگلے ہفتے کے اوائل میں واشنگٹن میں امریکی صدر ڈونلڈ ٹرمپ سے ملاقات کرنے کی امید رکھتے ہیں۔اگر یہ دورہ اس ٹائم فریم میں ہوتا ہے تو نیتن یاہو پہلے غیر ملکی رہنما ہوں گے جو ٹرمپ سے وائٹ ہاؤس میں ملاقات کریں گے۔نام ظاہر نہ کرنے کی شرط پر بات کرنے والے دونوں عہدیداروں نے کہا کہ جب ٹرمپ کے مشرق وسطیٰ کے خصوصی ایلچی اسٹیو وٹ کوف اس ہفتے نیتن یاہو اور دیگر اسرائیلی حکام سے بات چیت کے لیے اسرائیل جائیں گے تو تفصیلات پر کام کیا جا سکتا ہے۔

ٹرمپ نے ایئر فورس ون میں سوار صحافیوں سے بات کرتے ہوئے آنے والے دورے کی طرف اشارہ کرتے ہوئے اس کی ٹائم لائن پر مزید تفصیلات فراہم نہیں کیں۔ انہوں نے کہا کہ میں مستقبل قریب میں بی بی (بنجمن) نیتن یاہو سے بات کروں گا۔نیتن یاہو کے منصوبوں کی اطلاع سب سے پہلے’ایکسوس‘ نے دی تھی۔ نیتن یاہو کے ترجمان عومر دوستری نے ایکس پلیٹ فارم کے ذریعے وضاحت کی کہ اسرائیلی وزیر اعظم کو ابھی تک وائٹ ہاؤس کا دورہ کرنے کا سرکاری دعوت نامہ موصول نہیں ہوا ہے۔

تاہم ایک اسرائیلی اہلکار نے کہا کہ نیتن یاہو فروری میں وائٹ ہاؤس کا دورہ کریں گے، لیکن انہوں نے کوئی تاریخ نہیں بتائی۔اسی تناظر میں وٹ کوف نے اتوار کو نیویارک شہر میں ایک یہودی معبدکے رسمی افتتاح کے دوران بتایا کہ وہ اسرائیل اور حماس کے درمیان جنگ بندی کے معاہدے پر توجہ مرکوز کرنے کے لیے بدھ کو اسرائیل کا سفر کریں گے۔

انہوں نے مزید کہا کہ ہمیں معاہدے پر صحیح طریقے سے عمل درآمد کرنا ہوگا۔ انہوں نے مزید کہا کہ معاہدے پر عمل درآمد اہم ہے۔ یہ پہلا قدم تھا، لیکن مناسب طریقے سے عمل درآمد کے بغیر ہمیں مطلوبہ نتائج حاصل نہیں ہوں گے۔ کشیدگی میں اضافہ ہو سکتا ہے اور یہ اچھی بات نہیں ہے۔ اس لیے ہم صورت حال پر نظر رکھیں گے۔امریکی حکام نے کہا کہ وٹ کوف عمل درآمد کے عمل کو آگے بڑھانے اور حماس کے زیر حراست امریکیوں اور دیگر افراد کی رہائی کو یقینی بنانے کے ساتھ ساتھ لبنان میں اسرائیل اور حزب اللہ کے درمیان نازک جنگ بندی کو مضبوط بنانے میں خاص طور پر دلچسپی رکھتے ہیں۔