نمس میں عنقریب 850 ڈاکٹرس اور طبی عملہ کے تقررات: دامودر راج نرسمہا
تقررات کے لیے جلد ہی اعلامیہ جاری کیا جائے گا
حیدرآباد، 6 جنوری (ایجنسیز)تلنگانہ کے وزیر صحت دامودر راج نرسمہا نے کہا کہ سرکاری ہاسپٹلس میں ڈاکٹرس اور طبی عملہ کی قلت دور کرنے کے لیے حکومت نے عنقریب 850 جائیدادوں پر تقررات کا فیصلہ کیا ہے۔ انہوں نے بتایا کہ نظام انسٹی ٹیوٹ آف میڈیکل سائنسیس میں ان تقررات کے لیے جلد ہی اعلامیہ جاری کیا جائے گا، جس میں ڈاکٹرس اور پیرا میڈیکل اسٹاف کی جائیدادیں شامل ہوں گی۔
تلنگانہ اسمبلی میں وقفۂ سوالات کے دوران کے سامبا سیوا راؤ کے سوال کا جواب دیتے ہوئے وزیر صحت نے کہا کہ سرکاری ہاسپٹلس میں طبی سہولتوں کو بہتر بنانے کے لیے مزید 490 وینٹی لیٹرس اور 9 ایم آر آئی آلات فراہم کرنے کا فیصلہ کیا گیا ہے۔ انہوں نے بتایا کہ اس وقت تلنگانہ کے سرکاری دواخانوں میں وینٹی لیٹرس کی تعداد 1790 ہے، جس میں مزید اضافہ کیا جائے گا۔
وزیر صحت کے مطابق گاندھی، عثمانیہ، ایم جے ایم اور دیگر بڑے ہاسپٹلس کے علاوہ ڈسٹرکٹ ہاسپٹلس میں بھی وینٹی لیٹرس کی تعداد میں اضافہ کیا جائے گا۔ انہوں نے کہا کہ نمس کی گنجائش میں نمایاں اضافہ کیا گیا ہے اور خانگی ہاسپٹلس کے مقابلے میں نمس میں زیادہ وینٹی لیٹرس دستیاب ہیں۔ نمس کے لیے مزید 125 وینٹی لیٹرس کا انتظام کیا جا رہا ہے۔
انہوں نے بتایا کہ 9 سرکاری ہاسپٹلس میں ایم آر آئی آلات فراہم کیے جائیں گے جبکہ گزشتہ سال 2013 نئی ایمبولنس گاڑیاں حاصل کی گئیں۔ گزشتہ دو برسوں میں 16 نئے ڈائیلاسیس سنٹر قائم کیے گئے ہیں۔ ٹریفک حادثات کے متاثرین کو فوری طبی امداد فراہم کرنے کے لیے ہر 25 کیلو میٹر کے فاصلے پر ٹراما اور ڈائیلاسیس سنٹر قائم کرنے کا منصوبہ ہے تاکہ مریض کو 20 منٹ کے اندر طبی سہولت فراہم کی جا سکے۔
وزیر صحت نے کہا کہ بستی دواخانوں میں بہتر طبی سہولتوں کی فراہمی کو حکومت نے منظوری دی ہے اور عثمانیہ و گاندھی ہاسپٹلس میں جدید طبی آلات شامل کیے جا رہے ہیں۔ انہوں نے بتایا کہ مارچ 2026 تک 60 کروڑ کی لاگت سے 8 نئے سٹی اسکیان مشینیں حاصل کی جائیں گی، جبکہ ایم ایم جے ہاسپٹل میں کینسر کے مریضوں کے لیے ریڈیشن تھراپی مشین 32 کروڑ کی لاگت سے حاصل کی گئی ہے۔ نمس میں 18 کروڑ کے طبی آلات تنصیب کے لیے تیار ہیں۔
غریب اور مستحق خاندانوں کے لیے ہیلت کارڈ کی اجرائی کے حوالے سے وزیر صحت نے کہا کہ جلد ہی ٹنڈرس طلب کیے جائیں گے اور کوئی بھی مستحق خاندان اس سہولت سے محروم نہیں رہے گا۔ انہوں نے مزید بتایا کہ آروگیہ شری اسکیم کے تحت علاج کی حد کو 5 لاکھ سے بڑھا کر 10 لاکھ کر دیا گیا ہے۔
