پٹنہ،02؍جولائی :(اردودنیا.اِن/ایجنسیاں) #بہار میں #وزیر #اعلی #نتیش کمار کی سیاسی مشکلات میں اضافہ اپوزیشن نہیں بلکہ ان کی #پارٹی کے وزراء اور ممبران اسمبلی کررہے ہیں۔ نتیش حکومت کے ایک #سینئر وزیر مدن ساہنی نے عہدیداروں کی من مانی سے تنگ آکر مستعفی ہونے کی پیش کش کی ہے۔ ساہنی نے عوامی طور پر کہا کہ ان کے اپنے محکمہ میں چاہے وہ پرنسپل سکریٹری ہوں یاچپراسی کوئی انہیں نہیں سنتا۔
مدن ساہنی فی الحال #دربھنگہ گئے ہیں اور انہوں نے ہفتہ کو واپس آنے کے بعد استعفیٰ دینے کا اعلان کیا۔یہ خیال کیا جاتا ہے کہ محکمہ کے پرنسپل سکریٹری نے 134 چائلڈ ڈویلپمنٹ پروجیکٹ افسران کے تبادلے کے سلسلے میں مدن ساہنی کی سفارش کو نظرانداز کیاہے ، اب اس کے بارے میں کوئی حل نکالا جارہا ہے۔ استعفیٰ کے معاملے کے ساتھ ساہنی نے یہ بھی واضح کیا کہ وہ #پارٹی چھوڑیں گے نہیں۔
لیکن یہ خیال کیا جاتا ہے کہ بہت سے وزراء جو تبادلے میں اپنی من مانی نہیں کرسکے اب انہوں نے محکمہ کے سکریٹری کے خلاف آواز اٹھانے کا فیصلہ کیا ہے۔ سابق وزیر اعلی جتن رام مانجھی بھی ساہنی کے حق میں ہیں اور کہا کہ انہوں نے ماضی میں این ڈی اے کی مقننہ پارٹی میں یہ چیزیں اٹھائی ہیں اور جب تک افسران ایم ایل اے اور وزیروں کا احترام نہیں کریں گے عدم اطمینان بڑھتا جائے گا۔
نتیش کمار کی پریشانیوں میں اضافہ نہ صرف ساہنی جیسے وزراء نے کیا بلکہ حکمران اتحاد یعنی بی جے پی کے دو ممبران اسمبلی گیانیندر سنگھ گیانو اور ہری بھوشن ٹھاکر بچول نے الزام لگایا کہ اس بار جون کے مہینوں میں وزرا نے افسران کے ٹرانسفر پوسٹنگ میں بہت پیسہ کمایا۔
ان کا کہنا ہے کہ بہت سے محکموں میں اپنی پسند کی پوسٹنگ کے لئے بولی لگائی گئی تھی۔ تاہم نتیش کمار نے بی جے پی کے ایم ایل اے ٹھاکر سے فون پر بات کرنے کے بعد معلومات حاصل کی۔ لیکن اس کا حل نکلا فی الحال کوئی نہیں جانتا۔
