اوڈیشہ کالج ریگنگ،سینئرز کے دباؤ پر فریشر نابالغ لڑکی کا بوسہ لینے پر مجبور،5 طلباء گرفتار
ممبئی :(اردودنیا.اِن/ایجنسیاں) اوڈیشہ کے ایک سرکاری کالج میں ریگنگ کا ایک چونکا دینے والا واقعہ سامنے آیا ہے۔ ضلع گنجام میں واقع ایک کالج میں طلباء کے ایک گروپ نے ایک فریشر کو زبردستی ایک نابالغ لڑکی کا بوسہ لینے پر مجبور کیا۔ واقعے کی ویڈیو وائرل ہونے کے بعد پولیس حرکت میں آگئی اور دو نابالغوں سمیت تین طالب علموں کو حراست میں لے لیا۔
کالج انتظامیہ نے واقعے میں ملوث طلبہ کے خلاف بھی سخت کارروائی کی اور 12 طلبہ کو نکال دیا۔ سوشل میڈیا پر ریگنگ کا یہ ویڈیو وائرل ہو رہا ہے، جس میں ایک فریشراپنے سینئیر کے دباؤ میں ایک نابالغ لڑکی کو بوسہ دیتا ہوا نظر آ رہا ہے۔اس نابالغ لڑکی کو گزشتہ ماہ ہی اس کالج میں داخلہ دیا گیا تھا۔ ویڈیو میں دیکھا جا سکتا ہے کہ کچھ سینئر ایک فریشر سے ایک نابالغ طالبہ کو زبردستی بوسہ لینے کو کہتے ہیں۔ جیسے ہی لڑکی اس کی وجہ سے پریشان ہونے لگتی ہے، ایک سینئر نے اس کا ہاتھ پکڑ لیا۔ فریشر بھی سینئر کی مخالفت کرتا ہے اور ایسا کرنے سے انکار کرتا ہے۔ لیکن ایک ملزم انکار کرنے پر اسے تھپڑ مارتا ہے۔
جس کے بعد سینئرز کے دباؤ پر فریشر نابالغ لڑکی کا بوسہ لینے پر مجبور ہو جاتا ہے۔ جس وقت ریگنگ کا یہ واقعہ ہو رہا تھا اس وقت اردگرد بہت سے دوسرے طلباء بھی موجود تھے۔ ان میں سے ایک نے ویڈیو بنا کر سوشل میڈیا پر وائرل کر دی۔ پولیس کو جب اس واقعہ کا علم ہوا تو انہوں نے ریگنگ کرنے والے پانچ طلباء کو حراست میں لے لیا۔
یہاں چونکا دینے والی بات یہ ہے کہ ریگنگ کے دوران وہاں دوسری لڑکیاں بھی موجود تھیں جو نابالغ طالبہ کی مدد کرنے اور جنسی ہراسانی کی مخالفت کرنے کے بجائے خوشی سے ہنستی نظر آئیں۔ کالج کی پرنسپل پرمیلا کھڈنگا نے ایک بیان میں کہا کہ واقعے میں ملوث تمام طالب علموں کی شناخت کر لی گئی ہے اور انہیں نکالنے کا فیصلہ کیا گیا ہے۔ پرنسپل نے یہ بھی کہا کہ ان 12 سیکنڈ ایئر کے طلباء کو امتحان میں بیٹھنے کی اجازت نہیں ہوگی۔کھڈنگا نے کہا کہ 12 طلباء کو کالج سے نکالنے کا فیصلہ ڈسپلنری کمیٹی اور اینٹی ریگنگ سیل کی میٹنگ میں لیا گیا۔ ان کا مزید کہنا تھا کہ بے دخلی کا عمل شروع کر دیا گیا ہے۔
پولیس نے بتایا کہ گرفتار کیے گئے پانچ طلبہ میں سے تین کی عمریں 18 سال سے زیادہ ہیں۔ جبکہ دو نابالغ ہیں۔ ان کا مزید کہنا تھا کہ یہ صرف ریگنگ کا معاملہ نہیں ہے بلکہ متاثرہ کو جنسی طور پر ہراساں کرنے کا معاملہ ہے۔ پولیس نے بتایا کہ ریگنگ کی دفعات کے علاوہ، ملزمان کے خلاف پولیس پروٹیکشن آف چلڈرن فرام سیکسول آفنسز (POCSO) ایکٹ اور IT ایکٹ کے تحت مقدمہ درج کیا گیا ہے۔
