نئی دہلی: (اردودنیا.اِن)وزیراعظم نریندر مودی نے آج ویڈیوکانفرنس کے ذریعے ہندوستان اور بنگلہ دیش کے درمیان’ دوستانہ پل‘کاافتتاح کیاہے۔ انہوں نے انتخابی ریاست تریپورہ میں بنیادی ڈھانچے کے کئی پروجیکٹوں کا افتتاح کیا اور سنگ بنیاد رکھا۔ اس موقع پر تریپورہ کے گورنر اور وزیراعلیٰ موجودتھے۔ اس موقع پربنگلہ دیش کی وزیراعظم کا بھی ویڈیو پیغام بھی سنایا گیا۔
تقریب سے خطاب کرتے ہوئے وزیراعظم نے کہاہے کہ تریپورہ پچھلے 30 سال کی حکومتوں اور پچھلے 3 سال کی دوہرے انجن والی حکومت کے درمیان واضح فرق کا تجربہ کر رہا ہے۔ گزشتہ برسوں میں بدعنوانی اور کمیشن کے کلچر کی جگہ اب فوائد براہ راست فیض پانے والوں کے کھاتوں میں پہنچ رہے ہیں۔
انہوں نے ان ملازمین کا بھی ذکر کیا جو تنخواہوں سے پریشان تھے اور اب وہ 7ویں تنخواہ کمیشن کے مطابق تنخواہ پا رہے ہیں۔ پہلی مرتبہ تریپورہ میں ایم ایس پی کا تعین کیاگیا، جہاں کسانوں کو اپنی پیداوار فروخت کرنے میں بہت سی پریشانیوں کا سامنا کرنے کی عادت تھی۔ انہوں نے اس بات کو اجاگرکیا کہ پہلے کی ہڑتالوں کے کلچر کی جگہ اب کاروبار میں آسانی کا ماحول ہے۔
نئی سرمایہ کاریوں نے بند ہوتی ہوئی صنعت کا پرانا پس منظر تبدیل کر دیا ہے۔ انہوں نے مزیدکہاہے کہ حجم کے اعتبار سے تریپورہ کی برآمدات میں 5 گنا اضافہ ہوا ہے۔وزیراعظم نے بتایاہے کہ گزشتہ 6 برسوں میں مرکزی حکومت نے تریپورہ کی ترقی کی تمام ضرورتوں کو پورا کیا ہے۔
ریاست کے لیے مرکزی رقم مختص کیے جانے میں قابل قدر اضافہ کیاگیا ہے۔
تریپورہ کو 2009 سے 2014 کے درمیان مرکزی ترقیاتی اسکیموں کے لیے 3500 کروڑ روپے ملے تھے،جبکہ 2014 سے 2019 کے درمیان تریپورہ کو 12000 کروڑ روپے سے زیادہ فراہم کیے گئے ہیں۔وزیراعظم نے دوہرے انجن والی حکومت کے فوائد کواجاگر کیا۔ انہوں نے اس بات کی طرف اشارہ کیا کہ ایسی ریاستیں جہاں ڈبل انجن کی حکومتیں نہیں ہیں، وہاں غریبوں، کسانوں اور خواتین کو مستحکم کرنے والی اسکیموں کو نافذ نہیں کیاجاتا یا ان میں پیش رفت بہت سست ہے۔
انہوں نے زور دے کر کہاکہ ڈبل انجن کی حکومت تریپورہ کو مستحکم کرنے کے لیے کام کر رہی ہے۔ انہوں نے مزید کہا کہ ڈبل انجن والی حکومت نے تریپورہ کو بجلی کی کمی والی ریاست سے تبدیل کر کے اضافی بجلی والی ریاست بنا دیا ہے۔
انہوں نے ریاست میں2 لاکھ دیہی مکانوں کو پینے کے پانی والے کنکشن فراہم کرنے، ڈھائی لاکھ مفت گیس کے کنکشن فراہم کئے جانے، تریپورہ کے ہر گاؤں کو کھلے میں رفع حاجت سے پاک بنائے جانے، 50 ہزار حاملہ خواتین کو ماترو وندنا یوجناکے فوائد فراہم کیے جانے اور 40 ہزار غریب کنبوں کو ان کے نئے مکان ملنے جیسیڈبل انجن والی حکومت کے ذریعے تبدیلی کے اقدامات کو اجاگر کیا۔وزیراعظم نے کہاہے کہ کنکٹی وٹی سے متعلق بنیادی ڈھانچے میں پچھلے تین برسوں میں زبردست بہتری آئی ہے۔ انہوں نے تریپورہ میں ہوائی اڈے کے کام میں تیزی اور انٹرنیٹ میں زبردست تبدیلی ، ریل رابطے اورآبی گزر گاہوں کا حوالہ دیا۔انہوں نے تری پورہ کے لیے ہیرا ترقی یعنی ہائی ویز ، آئی –ویز ، ریلویز اور ایئر ویز کے بارے میں بات کی۔
وزیراعظم نے کہاہے کہ کنکٹی وٹی ہندوستان اور بنگلہ دیش کے درمیان نہ صرف دوستی کو مستحکم کر رہی ہے بلکہ کاروبار کے لئے بھی ایک مضبوط رابطہ فراہم کر رہی ہے۔ انہوں بتایا کہ پورے خطے کو شمال مشرقی ہندوستان اور بنگلہ دیش کے درمیان تجارتی راہ داری کے طور پر فروغ دیا جا رہا ہے۔ وزیراعظم نے اس بات پر زور دیاہے کہ حالیہ برسوں میں جن ریل اور آبی کنکٹی وٹی کے پروجیکٹوں کو شروع کیا گیا ہے، انہیں اس پل کے ذریعے تقویت ملی ہے۔
اس سے جنوبی آسام ، میزورم اور منی پور کے ساتھ ساتھ تری پورہ اور بنگلہ دیش اور جنوب مشری ایشیاء کے درمیان کنکٹی وٹی میں بہتری آئے گی۔ مودی نے کہاہے کہ یہ پل بنگلہ دیش میں بھی اقتصادی مواقع میں اضافہ کرے گا۔ وزیراعظم نے پل کے پروجیکٹ کو مکمل کرنے میں بنگلہ دیشی حکومت اوربنگلہ دیش کی وزیراعظم کا شکریہ ادا کیا۔ وزیراعظم نے کہاہے کہ اس پل کے لیے سنگ بنیاد اْن کے بنگلہ دیش کے دورے کے دوران رکھا گیا تھا۔
وزیراعظم نے کہا کہ آج کئی پروجیکٹوں کا افتتاح کیا گیا ہے اور یہ اگرتلہ کو ایک اچھا شہر بنانے کی کوشش ہے۔ نیا مربوط کمان سینٹر ٹریفک سے متعلق مسائل اور جرائم کو روکنے میں تکنیکی مدد فراہم کرے گا۔ انہوں نے کہا کہ اسی طرح کثیر سطحی پارکنگ، تجارتی کمپلیکس اور ہوائی اڈے کو جوڑنے والی سڑک کے چوڑے ہونے سے، جن کا آج افتتاح کیا گیا ہے، اگرتلہ میں رہن سہن میں آسانی اور کاروبار کرنے میں آسانی میں مزید بہتری پیدا ہوگی۔
