نئی دہلی (اردودنیا.اِن/ایجنسیاں)پاکستان کرکٹ ٹیم کے کپتان بابر اعظم نیشنل ٹی ٹوئنٹی میں ناردرن کے خلاف سینٹرل پنجاب کی جانب سے سنچری بناکر اس فارمیٹ میں سب سے زیادہ سنچری بنانے والے پاکستانی کھلاڑی بن گئے ہیں۔پاکستان کرکٹ ٹیم کے کپتان اور پاکستانی بیٹنگ لائن کے لیے ریڑھ کی ہڈی کی حیثیت رکھنے والے بابر اعظم نے قومی ٹی 20 کپ کے دوران سینچری اننگز کھیلی تو مختصر فارمیٹ کی کرکٹ میں یہ ان کی چھٹی سینچری تھی۔
سنٹرل پنجاب کی جانب سے کھیلتے ہوئے بابر اعظم کی جانب سے ناردرن کی ٹیم کے خلاف بنائی گئی سینچری 2019 کے بعد سے ٹی 20 فارمیٹ میں ان کی چھٹی سینچری اننگز ہے۔ یہ بیٹنگ ریکارڈ اس لیے بھی قابل ذکر ہے کہ اس عرصے میں کسی اور پاکستانی بیٹسمین کی جانب سے ٹی 20 کرکٹ میں دو سینچریاں بھی نہیں بنائی گئی ہیں۔
ٹی 20 کرکٹ میں سینچری بنانے والے دیگر پاکستانی کھلاڑیوں میں احمد شہزاد اور کامران اکمل نے پانچ، پانچ جب کہ خرم منظور نے چار، مختار احمد اور شرجیل خان نے تین تین سینچریاں بنا رکھی ہیں۔ٹی 20 فارمیٹ میں چھٹی سنچری اننگز کھیلنے والے بابر اعظم نے میچ میں 63 گیندیں کھیل کر 105 رنز بنائے اور آؤٹ نہیں ہوئے۔ ان کی اننگز میں 11 چو کے اور تین چھکے شامل تھے۔
اپنی حالیہ اننگز کے بعد بابر اعظم نے پانچ ٹی ٹوئنٹی سینچریوں والے انڈین کپتان وراٹ کوہلی کو پیچھے چھوڑ دیا ہے جب کہ شین واٹسن اور روہت شرما کے برابر آ گئے ہیں، آسٹریلوی اور انڈین کرکٹرز بھی ٹی 20 کرکٹ میں چھ سینچریاں بنا چکے ہیں۔مختصر فارمیٹ کی کرکٹ کے گزشتہ تین برسوں کا جائزہ لیا جائے تو سب سے زیادہ سینچریوں کی فہرست میں بابر اعظم آگے ہیں۔
