آزاد فلسطینی ریاست کا قیام بنیادی حق ہے، اس سے دستبرداری ممکن نہیں: اقوام متحدہ

جینوا:(اردودنیا.اِن/ایجنسیز) اقوام متحدہ کے سیکرٹری جنرل انتونیو گوتیریس نے واضح اور دو ٹوک مؤقف اختیار کرتے ہوئے کہا ہے کہ آزاد فلسطینی ریاست کا قیام فلسطینی عوام کا بنیادی، جائز اور ناقابلِ تنسیخ حق ہے، اور اس سے دستبردار ہونے کا سوال ہی پیدا نہیں ہوتا۔ انہوں نے کہا کہ فلسطینی عوام کو عزت، انصاف اور اپنے مستقبل کا خود فیصلہ کرنے کا وہی حق ہے جو دنیا کی ہر قوم کو حاصل ہے۔

یہ پیغام انہوں نے فلسطینی عوام کے ساتھ یکجہتی کے عالمی دن کے موقع پر دیا، جسے ان کے ڈائریکٹر دفتر کے چیف کورتینائی راترائی نے پڑھ کر سنایا۔ انہوں نے زور دیا کہ قابض اور غیر قانونی اسرائیلی قبضے سے فلسطینی علاقوں کا فوری انخلاء ضروری ہے۔

گوتیریس نے بتایا کہ گزشتہ دو سالوں میں غزہ نے اسرائیلی جارحیت کے ایسے بدترین حالات کا سامنا کیا جس میں 70 ہزار سے زائد افراد شہید ہوئے، سینکڑوں ہزار زخمی ہوئے اور بنیادی ڈھانچہ تقریباً مکمل طور پر تباہ ہوگیا۔ خوراک، ادویات، پینے کے پانی، صحت اور نفسیاتی مدد تک رسائی نہ ہونے کے برابر ہے۔

سیکرٹری جنرل نے کہا کہ مغربی کنارے بشمول مشرقی القدس میں بھی فلسطینی سخت مشکلات کا شکار ہیں، جنہیں بستیوں میں اضافے، حملوں، جبری بے دخلی اور آبادکاروں کے مسلسل مظالم کا سامنا ہے۔

انہوں نے گزشتہ ماہ ہونے والی جنگ بندی کو امید کی کرن قرار دیتے ہوئے کہا کہ اقوام متحدہ کی سلامتی کونسل کا غزہ پر فیصلہ امن کی راہ میں اہم پیش رفت ہے۔ انہوں نے مصر، قطر، ترکیہ اور امریکہ کی کوششوں کو خصوصی طور پر سراہا اور تمام فریقین سے معاہدے پر مکمل عمل درآمد کا مطالبہ کیا۔

گوتیریس نے زور دیا کہ انسانی امداد کو غزہ میں فوری، وسیع اور بلا رکاوٹ پہنچایا جانا چاہیے، کیونکہ اسرائیل کی ذمہ داریاں بین الاقوامی عدالت انصاف کے فیصلے کے مطابق بالکل واضح ہیں۔ انہوں نے رکن ممالک پر زور دیا کہ وہ فلسطینی عوام کے لیے 4 ارب ڈالر کے ہنگامی امدادی فنڈ کی حمایت کریں۔

انہوں نے نشاندہی کی کہ انروا اب بھی لاکھوں فلسطینی پناہ گزینوں کا بنیادی سہارا ہے، اس لیے عالمی برادری کو اس کی ہر سطح پر معاونت جاری رکھنی چاہیے۔ انہوں نے یہ بھی بتایا کہ گذشتہ دو سالوں میں صحافیوں کی سب سے زیادہ شہادتیں اسی تنازع میں ہوئی ہیں، جن میں اقوام متحدہ اور انروا کے کئی ملازمین بھی شامل ہیں۔

گوتیریس نے اپنے بیان کے اختتام میں کہا کہ فلسطین کے لیے انصاف کا حصول دنیا بھر میں انسانی حقوق اور عالمی قوانین کے دفاع کے مترادف ہے، اور اقوام متحدہ فلسطینی عوام کے حقِ خود ارادیت کی حمایت سے کبھی پیچھے نہیں ہٹے گی۔ انہوں نے عالمی برادری پر زور دیا کہ یکجہتی کو عملی اقدامات میں بدلیں تاکہ زیتون کے درخت کو زندگی اور آنے والی نسلوں کو امید ملے۔