پانی پت میں لڑکی سے چھیڑچھاڑ، دونوں موٹر سائیکل سوار گرفتار

نئی دہلی :(اردودنیا.اِن/ایجنسیز)ہریانہ کے پانی پت میں ایک چونکا دینے والا واقعہ پیش آیا جہاں سڑک پار کرنے والی لڑکی کو دو موٹر سائیکل سواروں نے نامناسب طریقے سے چھوا۔ پولیس نے بروقت کارروائی کرتے ہوئے دونوں شرپسندوں کو گرفتار کر لیا۔

ایس پی بھوپیندر سنگھ کی ہدایت پر پولیس نے سوشل میڈیا پر وائرل ہونے والی ویڈیو کی بنیاد پر فوری ایکشن لیا۔ ویڈیو میں دیکھا گیا کہ بائیک پر سوار دو نوجوان لڑکیوں کے ساتھ بدسلوکی کر رہے تھے۔ پولیس نے موٹر سائیکل نمبر کی مدد سے دونوں کو شناخت کرکے گرفتار کیا۔

پولیس نے بتایا کہ گرفتار ملزمان کی شناخت پرمود اور سنجیو کے طور پر ہوئی ہے، جو یوپی کے باغپت ضلع کے سنولی گاؤں کے رہائشی ہیں۔ دورانِ تفتیش ملزمان نے اپنے جرم کا اعتراف کیا اور بتایا کہ وہ کباڑ خریدنے پانی پت آئے تھے اور واپسی کے دوران اس حرکت کو انجام دیا۔

ایس پی بھوپیندر سنگھ نے واضح کیا کہ خواتین کے خلاف جرائم کسی بھی صورت برداشت نہیں کیے جائیں گے۔ خواتین پولیس کی درگا شکتی ٹیم، خواتین تھانہ اور ERV کو مختلف ہاٹ اسپاٹ مقامات پر تعینات کیا گیا ہے تاکہ خواتین میں تحفظ کا احساس قائم رہے۔

انہوں نے کہا کہ پولیس خواتین کی حفاظت کے لیے ہمہ وقت تیار ہے اور ہراسانی یا چھیڑچھاڑ کے واقعات میں ملوث افراد کو کسی قیمت پر معاف نہیں کیا جائے گا۔