پارلیمنٹ کی سیکورٹی میں نقب زنی، چھٹا ملزم مہیش کماوت بھی گرفتار

نئی دہلی،16دسمبر:(اردودنیانیوز.کام/ایجنسیز)سرکاری ذرائع نے بتایا کہ دہلی پولیس کے اسپیشل سیل نے پارلیمنٹ کی حفاظت کی خلاف ورزی کیس کے چھٹے ملزم مہیش کماوت کو مجرمانہ سازش اور شواہد کو تباہ کرنے کے الزام میں گرفتار کیا ہے۔ اسے پٹیالہ ہاؤس کورٹ میں پیش کیا جائے گا اور امکان ہے کہ پولیس اس سے پوچھ گچھ کے لیے اس کی تحویل میں لے گی۔ جمعرات کو للت جھا اور مہیش نے کرتویہ پتھ پولیس اسٹیشن پہنچ کر خودسپردگی کی، دونوں کو تفتیش کے لیے خصوصی سیل لے جایا گیا۔جھا کو گرفتار کر لیا گیا، جبکہ مہیش کو پوچھ گچھ کے لیے حراست میں لیا گیا۔ پوچھ گچھ کے دوران کیلاش کا ملوث ہونا سامنے آیا، جس کی وجہ سے اسے حراست میں لے لیا گیا۔ جھا، جس کی شناخت پوری سازش کے ماسٹر مائنڈ کے طور پر کی گئی ہے، مبینہ طور پر پارلیمنٹ کے باہر مہیش اور کیلاش کے ساتھ موجود تھا، جن دونوں کو اب پولیس نے پکڑ لیا ہے اور ان سے پوچھ گچھ کی جا رہی ہے۔

مہیش نے ‘بھگت سنگھ فین پیج’ نامی فیس بک گروپ کے ذریعے جھا اور دیگر لوگوں سے رابطہ کیا تھا۔ پولیس فی الحال اس معاملہ میں مہیش کماوت سے پوچھ گچھ کر رہی ہے۔ مہیش پر اس سازش میں للت کی مدد کرنے کا الزام ہے۔ آپ کو بتا دیں کہ اس معاملے میں پولیس کو مہیش کماوت کی تلاش تھی جس نے للت جھا کی حمایت کی تھی۔ پولیس نے مہیش کماوت کے انسٹاگرام اکاؤنٹ کو ڈی کوڈ کر لیا ہے۔ مہیش کے انسٹاگرام اکاؤنٹ سے بھی کئی بڑے انکشافات سامنے آئے ہیں۔ذرائع سے ملی اطلاع کے مطابق دہلی پولیس کو معلوم ہوا ہے کہ اس اکاؤنٹ کے ذریعے نوجوانوں کو اکسانے اور انقلاب کے نام پر ان کا برین واش کرنے کی سازش رچی جارہی تھی۔ یہ ملزمان انقلابیوں کی تصاویر کا استعمال کرتے ہوئے حکومت مخالف ویڈیوز بناتے تھے اور ان سے نوجوانوں کا برین واش کرنے کی کوشش بھی کرتے تھے۔

فی الحال، پولیس پوچھ گچھ کے دوران اس اکاؤنٹ سے موصول ہونے والی معلومات کو ملزم کے سامنے پیش کر رہی ہے۔پولیس ذرائع کے مطابق للت جھا نے پوچھ گچھ کے دوران بتایا ہے کہ پارلیمنٹ کی سیکورٹی کو پامال کرنے کے پیچھے ان کا مقصد انتشار پھیلانا تھا۔ پٹیالہ ہاؤس کورٹ میں للت جھا کی پیشی کے دوران، دہلی پولیس نے دعویٰ کیا کہ ملزم للت جھا نے اعتراف کیا ہے کہ وہ پارلیمنٹ کی سیکورٹی کی خلاف ورزی کرنے سے پہلے کئی بار دیگر ملزمان سے ملا تھا۔اس نے یہ پورا پلان دیگر ملزمان کے ساتھ میٹنگ میں تیار کیاتھا۔ ذرائع کے مطابق واقعہ کے بعد للت جھا راجستھان کے ناگور فرار ہو گیا تھا، تحقیقات سے پتہ چلا کہ کیلاش اور مہیش کماوت جو کزن ہیں، نے وہاں ان کے قیام کا انتظام کیا تھا۔ اب ان دونوں کی گرفتاری کے لیے بھی کوششیں جاری ہیں۔