اوڈیشہ سرکار ایمرجنسی میں پس زنداں ہونے والوں کو 20 ہزار پنشن دے گی

نئی دہلی ،13جنوری :(اردودنیا.اِن/ایجنسیز) اوڈیشہ کی بھاجپا سرکار نے ایمرجنسی کے دوران جیل کی سزا کاٹنے والے لوگوں کے لیے پنشن اسکیم شروع کی ہے۔ اس اسکیم کے تحت حکومت اس مدت کے دوران جیل جانے والے لوگوں کو 20,000 روپے ماہانہ پنشن دے گی۔ اس کے علاوہ ان کا مفت علاج بھی کیا جائے گا۔اوڈیشہ میں بی جے پی حکومت نے اعلان کیا ہے کہ ایمرجنسی کے دوران ریاست کی مختلف جیلوں میں بند لوگوں کو اب 20,000 روپے ماہانہ پنشن اور مفت طبی سہولت ملے گی۔

اوڈیشہ محکمہ داخلہ کی طرف سے جاری کردہ ایک سرکاری حکم میں کہا گیا ہے کہ ریاستی حکومت نے کافی غور و فکر کے بعد 25جون 1975 سے لیکر 21مارچ 1977 کی مدت کے دوران میسا یا ڈی آئی آر یا ڈی آئی ایس آئی آر کے تحت اوڈیسہ کے جیلوں میں بند لوگوں کو پنشن اور دیگر مراعات دینے کا فیصلہ کیا ہے۔خیال رہے کہ خاتونِ آہن سابق وزیر اعظم اندرا گاندھی نے ملک کو اندرونی اور بیرونی خطرات کا حوالہ دیتے ہوئے 1975 سے 1977 کے درمیان 21 ماہ کی ملک گیر ایمرجنسی کا اعلان کیا تھا۔ اوڈیشہ حکومت کا یہ اقدام بی جے پی کے سیاسی ایجنڈے کا بھی ایک حصہ ہے جو ایمرجنسی کی سخت ناقد رہی ہے۔