راہل گاندھی کو ہتک عزت کیس میں ملی بڑی راحت

نئی دہلی ،20جنوری :(اردودنیا.اِن/ایجنسیز)سپریم کورٹ نے جھارکھنڈ کی راجدھانی رانچی میں کانگریس لیڈر راہل گاندھی کے خلاف چل رہے ہتک عزت کے مقدمے پر عبوری روک لگا دی ہے۔ شکایت کنندہ کو نوٹس جاری کرکے کیس ختم کرنے کا مطالبہ کیا گیا ہے۔ سال 2018 میں بی جے پی کے ایک کارکن نے اس وقت کے بی جے پی صدر امت شاہ کو قاتل کہنے والے بیان دینے پر یہ مقدمہ درج کیا تھا۔سال 2018 میں کانگریس کے اجلاس میں تقریر کرتے ہوئے کانگریس لیڈر راہل گاندھی نے کہا تھا کہ بی جے پی ایسی پارٹی ہے کہ اس کے کارکن ایک قاتل کو بھی صدر تسلیم کر لیتے ہیں۔

راہل نے اس کیس کو ختم کرنے کے لیے جھارکھنڈ ہائی کورٹ میں عرضی داخل کی تھی۔ لیکن گزشتہ سال فروری میں منظور کیے گئے ایک حکم میں ہائی کورٹ نے اس کیس کو منسوخ کرنے سے انکار کر دیا تھا۔ اس کے خلاف سپریم کورٹ سے رجوع ہونے والے راہل گاندھی کی نمائندگی سینئر وکیل ابھیشیک منو سنگھوی نے کی۔سینئر وکیل ابھیشیک منو سنگھوی نے جسٹس وکرم ناتھ اور سندیپ مہتا کی بنچ کو بتایا کہ شکایت کنندہ اس کیس میں براہ راست متاثر نہیں ہوتا ہے۔ ایسے حالات میں یہ کیس آگے نہیں بڑھ سکتا۔

ججوں نے شکایت کنندہ نوین جھا کو نوٹس جاری کرتے ہوئے اس معاملے پر ان سے جواب طلب کیا۔ سپریم کورٹ میں کیس کی اگلی سماعت 6 ہفتے بعد ہوگی۔ تب تک نچلی عدالت کی کارروائی معطل رہے گی۔راہل گاندھی کی اپیل پر جسٹس وکرم ناتھ اور جسٹس سندیپ مہتا کی بنچ نے جھارکھنڈ حکومت اور بی جے پی لیڈر کو نوٹس جاری کرتے ہوئے ان سے جواب طلب کیا ہے۔ راہل گاندھی نے جھارکھنڈ ہائی کورٹ کے حکم کو چیلنج کیا ہے۔ ہائی کورٹ نے راہل گاندھی کے خلاف نچلی عدالت میں کی گئی کارروائی کو منسوخ کرنے کی درخواست کرنے والی ان کی درخواست کو مسترد کر دیا تھا۔

دہلی ایمس میں بہتر سہولیات کیلئے راہل نے جے پی نڈا اور آتشی کو لکھا خط

نئی دہلی ،20جنوری :(اردودنیا.اِن/ایجنسیز)لوک سبھا میں قائد حزب اختلاف اور کانگریس کے ممبر پارلیمنٹ راہل گاندھی نے پیر کو مرکزی وزیر صحت جے پی نڈا اور دہلی کے وزیر اعلیٰ آتشی کو ایک خط لکھا۔ جس میں انہوں نے دہلی ایمس میں مریضوں کو بہتر سہولیات فراہم کرنے کی بات کہی۔ کانگریس کے ممبر پارلیمنٹ راہل گاندھی نے بھی اس خط کو سوشل میڈیا پلیٹ فارم پر شیئر کیا۔راہل گاندھی نے کہا کہ شدید سردی میں مریض اور ان کے لواحقین میٹرو اسٹیشن کے نیچے سونے پر مجبور ہیں،جہاں پینے کے پانی یا بیت الخلاء کا کوئی انتظام نہیں ہے۔ دہلی ایمس میں اتنی بڑی تعداد میں مریضوں کا آنا یہ بھی ظاہر کرتا ہے کہ جہاں وہ رہتے ہیں وہاں لوگوں کو سستی اور اچھے معیار کی صحت کی سہولیات نہیں مل رہی ہیں۔

اپنے خط میں انہوں نے دہلی کے وزیر اعلیٰ اور مرکزی وزیر صحت سے اس پر فوری کارروائی کرنے کو بھی کہا ہے۔ کانگریس کے ممبر پارلیمنٹ راہل گاندھی نے سوشل میڈیا پلیٹ فارم ایکس پر لکھا کہ میں نے دہلی کے وزیر اعلیٰ اور مرکزی وزیر صحت کو ایک خط لکھا ہے تاکہ ملک بھر سے دہلی ایمس میں آنے والے مریضوں اور ان کے اہل خانہ کو بہتر سہولیات فراہم کی جائیں۔ حال ہی میں میں نے دیکھا کہ یہ لوگ شدید سردی میں میٹرو اسٹیشن کے نیچے سونے پر مجبور ہیں جہاں پینے کے پانی یا بیت الخلاء کا کوئی انتظام نہیں ہے۔

ادھر ادھر کچرے کے ڈھیر بھی پڑے ہیں۔ دہلی ایمس میں اتنی بڑی تعداد میں مریضوں کا آنا یہ بھی ظاہر کرتا ہے کہ جہاں وہ رہتے ہیں وہاں لوگوں کو سستی اور اچھے معیار کی صحت کی سہولیات نہیں مل رہی ہیں۔انہوں نے پوسٹ میں مزید لکھا کہ مجھے امید ہے کہ میرے خط کا نوٹس لیتے ہوئے دہلی کے وزیر اعلیٰ اور مرکزی وزیر صحت اس انسانی بحران کو حل کرنے کے لیے فوری اقدامات کریں گے۔ یہ بھی امید ہے کہ مرکزی حکومت آئندہ بجٹ میں صحت عامہ کے نظام کو مضبوط بنانے اور اس کے لیے درکار وسائل میں اضافہ کرنے کے لیے ٹھوس اقدامات کرے گی۔کانگریس کے ممبر پارلیمنٹ راہل گاندھی کل دیر رات دہلی ایمس گئے تھے۔ اس دوران انہوں نے مریضوں اور ان کے اہل خانہ سے سسٹم کے بارے میں معلومات حاصل کیں۔

راہل گاندھی نے سوشل میڈیا پلیٹ فارم ایکس پر اس کا ویڈیو بھی شیئر کیا، جس میں انہوں نے لکھا کہ ایمس کے باہر جہنم! ملک بھر سے غریب مریض اور ان کے اہل خانہ ایمس کے باہر سردی، غلاظت اور بھوک میں سونے پر مجبور ہیں۔ ان کے پاس نہ چھت ہے، نہ کھانا، نہ بیت الخلا اور نہ پینے کا پانی۔ بڑے بڑے دعوے کرنے والی مرکزی اور دہلی حکومتوں نے اس انسانی بحران پر کیوں آنکھیں بند کر رکھی ہیں؟