راہل گاندھی 8 سے 15 دسمبر تک غیرملکی دورے پر ہوں گے

نئی دہلی،28نومبر:(اردودنیانیوز.کام/ایجنسیز) پانچ ریاستوں کے اسمبلی انتخابات میں مہم چلانے کے بعد کانگریس لیڈر راہل گاندھی 8 سے 15 دسمبر تک تین ممالک کا دورہ کرنے والے ہیں۔ ذرائع نے بتایا کہ راہل گاندھی 8 سے 15 دسمبر تک انڈونیشیا، سنگاپور اور ملائیشیا کے دورے پر رہیں گے۔انہوں نے کہا کہ راہل گاندھی اپنے دورے کے دوران ہندوستانی تارکین وطن سے بات چیت کریں گے اور یونیورسٹیوں کا بھی دورہ کریں گے۔اس سال راہل گاندھی نے ناروے، ہالینڈ، فرانس، امریکہ، برطانیہ، بلجیم سمیت کئی ممالک کا دورہ کیا اور ہندوستانی تارکین کے ساتھ بات چیت کے پروگراموں کا اہتمام کیا۔ انہوں نے متعدد یونیورسٹیوں میں طلباء کے ساتھ وسیع موضوعات پر بات چیت کے سیشنز بھی منعقد کئے۔ذرائع نے بتایا کہ انڈین اوورسیز کانگریس راہل گاندھی کے تمام پروگراموں کا انتظام کرے گی۔ راہل گاندھی نے پانچ ریاستوں میزورم، راجستھان، تلنگانہ، چھتیس گڑھ اور مدھیہ پردیش میں بڑے پیمانے پر انتخابی مہم چلائی ہے۔ وہ پانچ ریاستوں میں اپنے مصروف انتخابی مہم کے شیڈول کے دوران اس ماہ کیدارناتھ مندر بھی گئے تھے۔