راجستھان: چپراسی کے 54 ہزار عہدوں پر 25 لاکھ نوجوان امتحان دینے پہنچے، 75 فیصد ’اوور کوالیفائیڈ‘

نئی دہلی:(اردودنیا.اِن/ایجنسیز) راجستھان میں 20 سال بعد چوتھے گریڈ (کلاس 4) کے ملازمین کی بھرتی کا آغاز ہو گیا ہے۔ اس بھرتی کے ذریعے جملہ 53,749 چپراسی (کلاس 4) کی آسامیوں پر امیدواروں کا انتخاب کیا جائے گا۔ تقریباً 24 لاکھ 75 ہزار امیدوار امتحان دینے پہنچے ہیں، جن میں 75 فیصد ایسے ہیں جو مقررہ تعلیمی معیار (دسویں پاس) سے زیادہ تعلیم یافتہ ہیں۔

راجستھان کی راجدھانی جے پور میں امتحان کے دن نوجوانوں کی لمبی قطاریں دیکھنے کو ملیں، جن میں پی ایچ ڈی ہولڈرز، ایم بی بی ایس، پوسٹ گریجویٹ، ڈبل ایم اے اور بی ایڈ ڈگری رکھنے والے امیدوار بھی شامل تھے۔ بیشتر امیدواروں کا کہنا تھا کہ بے روزگاری کی وجہ سے چاہے ملازمت چھوٹی ہو، لیکن سرکاری نوکری حاصل کرنا سب سے اہم ترجیح ہے۔

سرکاری ذرائع کے مطابق، ریاست کے 38 اضلاع میں 1,286 امتحان مراکز قائم کیے گئے ہیں۔ امتحان تین دن یعنی 19، 20 اور 21 ستمبر کو چھ شیفٹوں میں منعقد کیا جا رہا ہے۔ ہر شفٹ میں تقریباً 4 لاکھ 11 ہزار 843 امیدوار امتحان دیں گے۔ جے پور میں جمعہ کو پہلی شفٹ صبح 10 بجے سے دوپہر 12 بجے تک اور دوسری شفٹ دوپہر 3 بجے سے شام 5 بجے تک ہوئی۔ امیدواروں کو میٹل ڈیٹیکٹر کے ذریعے سخت چیکنگ کے بعد امتحان ہال میں داخل کیا گیا، اور ایک گھنٹہ قبل از وقت داخلے پر پابندی لگا دی گئی۔

ماہرین کا کہنا ہے کہ اتنی بڑی تعداد میں اعلیٰ تعلیم یافتہ نوجوانوں کا چپراسی کی آسامی کے لیے امتحان دینا ایک واضح علامت ہے کہ ریاست میں بے روزگاری عروج پر ہے۔ امیدواروں نے میڈیا سے بات کرتے ہوئے کہا کہ روزگار کے حصول کے لیے سرکاری ملازمت میں چھوٹی پوسٹ بھی ان کے لیے قیمتی ہے۔

راجستھان اسٹاف ریکروٹمنٹ بورڈ (RSRB) کے مطابق، اس بھرتی کے بعد ہزاروں نوجوان سرکاری ملازمت حاصل کریں گے، اور یہ ریاست کے نوجوانوں کے لیے ایک اہم موقع ہے۔