راجستھان: کرنی سینا کے صدر کے قتل پر ہنگامہ نئے وزیر اعلیٰ کو قاتل کے کیفرکردار تک پہنچنے حلف نہیں لینے دیں گے

جے پور، 6دسمبر :(اردودنیانیوز.کام/ایجنسیز) جے پور میں ’راشٹریہ راجپوت کرنی سینا‘ کے صدر سکھ دیو سنگھ گوگامیڑی کے قتل کے بعد پورے راجستھان میں ہنگامہ ہے۔ حکومت کی تبدیلی کے ساتھ ہی اس بڑے واقعہ کے سبب بی جے پی کو سخت مشکلات کا سامنا ہے۔ بی جے پی کو لے کر لوگوں میں غصہ صاف نظر آ رہا ہے، اسی لیے اب راجپوت کرنی سینا کے صدر مہیپال سنگھ مکرانہ نے اعلان کیا ہے کہ وہ نئے وزیر اعلیٰ کو حلف نہیں لینے دیں گے۔مہی پال سنگھ مکرانہ نے خبردار کیا کہ راجستھان میں نئے وزیر اعلیٰ کو اس وقت تک حلف نہیں اٹھانے دیں گے جب تک سکھ دیو سنگھ گوگامیڈی کے قاتلوں کا انکاؤنٹر نہیں ہو جاتا۔مہی پال سنگھ مکرانہ نے کہا ہے کہ ان کے تین اہم مطالبات ہیں جن میں اس معاملے کی این آئی اے سے تحقیقات، ملزمین کا انکاؤنٹر اور گوگامیڈی کو سکیورٹی فراہم نہ کرنے کے معاملے کی ہائی کورٹ کے جج سے تفتیش شامل ہے۔ سکھ دیو سنگھ گوگامیڈی کے قتل کیخلاف راجستھان کے جے پور میں لوگوں نے احتجاج کیا ہے۔

کرنی سینا نے راجستھان بند کا اعلان کیا ہے اور جے پور میں کاروباری تنظیموں نے بھی بند کی کال دی ہے۔ شہر میں چلنے والی لو فلور بسوں کا آپریشن روک دیا گیا ہے۔ اس کے ساتھ ساتھ پرائیویٹ اسکول بھی بند کر دیے گئے ہیں۔وہیں راجستھان میں پولیس نے کرنی سینا کے صدر سکھ دیو سنگھ گوگامیڈی کے قتل کیس میں کارروائی کی ہے۔ پولیس نے اس معاملے میں ہریانہ سے دو لوگوں کو گرفتار کیا ہے۔ بتایا جا رہا ہے کہ پولیس نے قاتلوں کے ساتھ آئے نوین کے موبائل فون سے حقائق اکٹھے کر لیے ہیں۔

معلومات کے مطابق، قتل کے ملزم نوین کو اپنے ساتھ گوگامیڈی کے گھر لے گئے تھے۔ نوین کی موت کے بعد پولیس نے اس کے اہل خانہ سے معلومات اکٹھی کی تھیں۔ جس کے بعد پولیس نے کارروائی کی۔قابل ذکر ہے کہ گوگامیڑی کوکل گزشتہ منگل کی دوپہر جے پور میں گولی مار کر ہلاک کر دیا گیا تھا۔ پولیس نے بتایا کہ منگل کی دوپہر تقریباً ڈیڑھ بجے دو بدمعاش گوگامیڑی کے گھر پہنچے اور فائرنگ شروع کر دی۔ فائرنگ کے بعد قاتل فرار ہو گئے۔ اس واقعہ کے دوران حملہ آوروں نے نوین شیخاوت کو بھی گولی مار دی جو ان کے ساتھ آیا تھا۔ گھر میں موجود ایک اور شخص شدید زخمی ہو گیا۔ روہت گودارا گینگ نے اس حملے کی ذمہ داری قبول کی ہے۔ گوگامیڑی پر حملے کا پورا واقعہ گھر میں نصب سی سی ٹی وی کیمرے میں ریکارڈ بھی ہو گیا ہے۔