رمضان المبارک: برکتوں اور سعادتوں کا مہینہ رخصت ہونے کو ہے-ڈاکٹر مرضیہ عارف (بھوپال)

رمضان المبارک کا مقدس مہینہ جو خیروبرکت اور سعادت و عبادت سے بھرپور ہے، اب ہم سے رخصت ہو رہا ہے۔ مبارک ہیں وہ خوش نصیب بندے اور بندیاں جنہوں نے اس ماہ کی برکتوں کو سمیٹا، روزہ، نماز، تلاوت اور ذکر و فکر میں مشغول رہے، ہر ایک کے ساتھ نیکی اور بھلائی سے پیش آئے اور نفسانی خواہشات سے دور رہے۔ جبکہ بدنصیب وہ لوگ ہیں جنہوں نے اس مبارک مہینے کی قدر نہ کی اور شعائرِ رمضان کا احترام نہ کیا۔ ایسے لوگ جو روزہ رکھنے، سحر و افطار کرنے اور نماز پڑھنے کے باوجود جھوٹ، فریب، جھگڑے اور فساد میں مبتلا رہے، وہ رمضان کی روحانی برکتوں سے محروم رہیں گے۔

رمضان المبارک کی فضیلت

رمضان وہ مہینہ ہے جس میں اللہ تعالیٰ نے قرآن پاک نازل فرمایا، جو تمام انسانوں کے لیے ہدایت ہے۔ اسی لیے روزے کے لیے اسی ماہ کو منتخب کیا گیا۔ اس ماہ میں عبادات کا اجر کئی گنا بڑھ جاتا ہے، نوافل کا ثواب فرضوں کے برابر اور فرضوں کا ثواب ستر گنا زیادہ ہو جاتا ہے۔ ہمیں اس ماہ کی برکتوں پر اللہ تعالیٰ کا شکر ادا کرنا چاہیے، کیونکہ بہت سے عزیز جو پچھلے سال ہمارے ساتھ تھے، آج ہم میں موجود نہیں ہیں۔ اس لیے رمضان کی نعمتوں پر شکرگزاری ہی حقیقی کامیابی ہے۔

جمعۃ الوداع: رمضان کا آخری جمعہ

رمضان المبارک کا آخری جمعہ، جسے جمعۃ الوداع کہا جاتا ہے، ہمیں اس مبارک مہینے کے رخصت ہونے کا پیغام دیتا ہے۔ بہت سے اہلِ ایمان اس دن کو رمضان کی جدائی کا دن سمجھ کر دلگیر اور رنجیدہ ہو جاتے ہیں، کیونکہ وہ محسوس کرتے ہیں کہ اب وہ تراویح، تہجد، سحر وافطار کی برکتوں سے محروم ہونے والے ہیں۔ یہ دن ہمیں یہ سبق دیتا ہے کہ جو ساعتیں باقی رہ گئی ہیں، انہیں ضائع نہ کریں، توبہ و استغفار کریں اور اپنی نیکیوں میں اضافہ کریں۔

جمعہ کی فضیلت

جمعہ کو تمام ایام کا سردار اور "عید المومنین” کہا جاتا ہے۔ اللہ تعالیٰ نے اس دن کی نسبت سے ایک سورہ "جمعہ” نازل فرمائی، جس میں ارشاد ہے: "اے ایمان والو! جب جمعہ کے دن نماز کے لیے پکارا جائے تو اللہ کے ذکر کی طرف دوڑو اور خرید و فروخت بند کر دو۔” (القرآن)

نبی کریم ﷺ نے فرمایا: "بہترین دن جس میں سورج طلوع ہوتا ہے، وہ جمعہ کا دن ہے، اسی دن حضرت آدم ؑ پیدا ہوئے، اسی دن وہ جنت میں داخل ہوئے اور اسی دن ہی قیامت قائم ہوگی۔” رمضان میں جمعہ کی اہمیت اور بھی بڑھ جاتی ہے، کیونکہ نبی پاک ﷺ نے فرمایا: "جمعہ مساکین اور فقراء کا حج ہے۔” (حدیث)

جمعۃ الوداع اور عید الفطر کا پیغام

جمعۃ الوداع ہمیں عید کی خوشخبری سناتا ہے اور تلقین کرتا ہے کہ جس طرح ہم نے رمضان میں اپنے دامن کو نیکیوں سے بھر لیا، اب عید کی خوشیاں سب کے ساتھ بانٹیں اور ان مستحق افراد کو بھی یاد رکھیں جو غریب اور بے سہارا ہیں۔ اللہ کے وہ بندے مبارکباد کے مستحق ہیں جو رمضان کو اعمالِ صالحہ کے ساتھ رخصت کر رہے ہیں۔

رمضان کی تربیت: زندگی بھر کے لیے نصیحت

رمضان المبارک کی عبادات محض ایک مہینے کے لیے نہیں، بلکہ یہ پورے سال کے لیے تربیت فراہم کرتا ہے۔ افسوس کی بات ہے کہ بعض لوگ رمضان کو سالانہ تہوار سمجھ کر عبادات کرتے ہیں، لیکن جیسے ہی یہ مہینہ ختم ہوتا ہے، وہ اپنی نیک عادتوں کو ترک کر دیتے ہیں۔ حقیقت میں ایک مسلمان کی پوری زندگی رمضان کی مانند ہونی چاہیے۔

اللہ تعالیٰ ہمیں رمضان کی تربیت کو زندگی بھر اپنانے کی توفیق عطا فرمائے۔ آمین! اور آخر میں تمام اہلِ اسلام کو عید الفطر مبارک ہو!