جنسی زیادتی کی شکار لڑکی نے کی خودکشی ،خودکشی نوٹ میں لکھا’ماں کا پیٹ اورقبر‘2ہی جگہ محفوظ

چنئی، 19 دسمبر:(اردودنیا.اِن/ایجنسیاں)چنئی کے پوناملے علاقے میں 11 ویں جماعت کی طالبہ نے جنسی زیادتی کا شکار ہو کر خودکشی کر لی۔ جان دینے سے پہلے نابالغ لڑکی نے خط بھی لکھا۔ اس دل دہلا دینے والے خط میں وہ اپنی تنہائی، جبر کے خلاف اپنی لڑائی کے بارے میں لکھتی ہیں۔ یہ بھی بتایا جاتا ہے کہ جب وہ تناؤ کے اس دور سے گزر رہی تھی تو نہ اس کا اسکول اور نہ ہی گھر محفوظ تھا۔

یہ خودکشی نوٹ متوفی کے گھر سے ملا ہے اور پولس اس کے ذریعہ معاملے کی جانچ کررہی ہے۔ لڑکی سرکاری اسکول کی طالبہ تھی۔ نوٹ میں اس نے لکھا ہے کہ صرف دو محفوظ جگہیں ہیں،ماں کا پیٹ اور قبر۔

اس کے والدین کا کہنا ہے کہ طالبہ پہلے پرائیویٹ اسکول میں پڑھتی تھی۔ وہاں اسے ایک ٹیچر کے بیٹے نے ہراساں کیا۔ تب وہ نویں جماعت میں تھی۔ اس کے بعد اس نے ایک سرکاری اسکول میں داخلہ لیا۔حالیہ کچھ عرصے میں ریاست میں خواتین کے خلاف جرائم میں بدقسمتی سے اضافہ ہوا ہے۔

گزشتہ ہفتے، تمل ناڈو کے کوئمبٹور ضلع میں ایک ہائی اسکول کے طالب علم کی لاش جھاڑیوں سے ملی تھی۔ وہ 11 دسمبر کو لاپتہ ہو گئی تھی۔ ایک اور معاملے میں کوئمبٹور ہی میں، ایک طالبہ نے الزام لگا کر خود کشی کر لی تھی کہ اس کے استاد نے اسے جنسی زیادتی کا نشانہ بنایا تھا۔ ملزم استاد اس وقت پولیس کی حراست میں ہے۔