رابرٹ واڈرا کو زمین گھوٹالہ کیس میں عدالت میں پیش ہونے کا حکم، 16 مئی تاریخ مقرر

نئی دہلی 15 اپریل:(اردودنیا.اِن/ایجنسیز) دہلی کی ایک خصوصی عدالت نے کانگریس لیڈر سونیا گاندھی کے داماد رابرٹ واڈرا کو زمین گھوٹالے سے متعلق منی لانڈرنگ کیس میں طلب کرتے ہوئے 16 مئی کو پیش ہونے کا حکم جاری کیا ہے۔ عدالت نے اس معاملے میں دیگر سات ملزمان کو بھی سمن جاری کیے ہیں۔

خصوصی جج سوشانت چنگوترا نے انفورسمنٹ ڈائریکٹوریٹ کی جانب سے داخل کردہ چارج شیٹ کا نوٹس لیتے ہوئے یہ احکامات صادر کیے۔ تفصیلی فیصلہ ابھی جاری نہیں کیا گیا ہے۔

انفورسمنٹ ڈائریکٹوریٹ نے گزشتہ سال جولائی میں رابرٹ واڈرا کے خلاف چارج شیٹ داخل کی تھی، جو کسی بھی فوجداری معاملے میں ان کے خلاف پہلا باقاعدہ قدم تھا۔ اس سے قبل اپریل 2025 میں ایجنسی نے ان سے مسلسل تین دن تک پوچھ گچھ بھی کی تھی۔

یہ کیس ہریانہ کے گروگرام ضلع کے مانیسر-شیکوپور علاقے میں زمین کے ایک متنازع سودے سے متعلق ہے۔ یہ سودا فروری 2008 میں اسکائی لائٹ ہاسپیٹیلیٹی نامی کمپنی کے ذریعے کیا گیا تھا، جس میں رابرٹ واڈرا ڈائریکٹر رہ چکے ہیں۔ کمپنی نے تقریباً ساڑھے تین ایکڑ زمین 7 کروڑ پچاس لاکھ روپے میں خریدی تھی۔

بعد ازاں ستمبر 2012 میں یہی زمین ایک بڑی رئیل اسٹیٹ کمپنی کو 58 کروڑ روپے میں فروخت کی گئی، جس کے بعد یہ معاملہ تنازع کا شکار ہو گیا۔ اکتوبر 2012 میں ایک سینئر افسر نے ضابطوں کی خلاف ورزی کا حوالہ دیتے ہوئے اس سودے کو منسوخ کر دیا تھا۔

رابرٹ واڈرا نے اپنے خلاف تمام الزامات کو مسترد کرتے ہوئے اسے سیاسی انتقام قرار دیا ہے۔ ان کا کہنا ہے کہ یہ کارروائیاں انہیں اور ان کے خاندان کو نشانہ بنانے کے لیے کی جا رہی ہیں۔

ادھر انفورسمنٹ ڈائریکٹوریٹ ان کے خلاف دیگر دو معاملات کی بھی جانچ کر رہی ہے، جن میں ایک غیر ملکی روابط اور دوسرا راجستھان میں زمین کے سودوں سے متعلق بتایا جا رہا ہے۔