ریاض،10فروری:(اردودنیا.اِن/ایجنسیز)ترکیہ کے فٹ بال کھلاڑی مریح دیمیرل Merih Demiral نے عالمی شہرت یافتہ پرتگیزی فٹ بال اسٹار کرسٹیانو رونالڈو کی دستخط شدہ جرسی زلزلہ زدگان کی امداد کے لیے نیلام کردی ہے۔دیمیرل یووینٹس فٹ بال کلب میں رونالڈو کے ساتھ کھیلتے ہیں۔انھوں نے ایک ٹویٹر پوسٹ میں لکھا ہے:’’میں نے ابھی کرسٹیانو سے بات کی۔انھوں نے ترکیہ میں جو کچھ ہوا،اس پرافسوس کا اظہارکیا ہے۔ ہم رونالڈو کی دستخط شدہ جرسی کو اپنے کلیکشن میں سے نیلام کررہے ہیں۔انھوں نے مزید بتایا کہ نیلامی سے حاصل ہونے والی تمام رقم زلزلے سے متاثرہ علاقوں میں امدادی سرگرمیوں کے لیے استعمال کی جائے گی۔
دیمیرل کے اس اقدام کے بعد اطالوی کھلاڑی لیونارڈو بونوچی اورارجنٹائن کے کھلاڑی پاؤلو ڈیبالا نے بھی اپنی دستخط شدہ جرسیاں عطیہ کی ہیں اورانھیں بھی نیلام کردیا گیا ہے۔دیمیرل کے ٹویٹر اکاؤنٹ کے مطابق جرسیاں مجموعی طور پر 2 لاکھ 65 ہزار 454 ڈالر (پچاس لاکھ ترک لیرا) میں فروخت ہوگئی ہیں۔ترکیہ اورہمسایہ ملک شام میں پیرکی صبح آنے والے تباہ کن زلزلے کے نتیجے میں بڑے پیمانے پرتباہی ہوئی اور دونوں ممالک میں انیس ہزارسے زیادہ اموات ہوئی ہیں۔7.8 شدت کا یہ زلزلہ خطے میں اب تک آنے والے سب سے طاقتور بھونچالوں میں سے ایک تھا۔اس کی تباہ کاریوں سے نمٹنے کے لیے متعدد ممالک نے دونوں ملکوں میں امدادی اور طبی ٹیمیں بھیجی ہیں اور انھوں نے متأثرہ علاقوں میں زلزلہ زدگان کے لیے امدادی مہم شروع کردی ہے۔واضح رہے کہ پرتگیزی اسٹارکرسٹیانو رونالڈو اب سعودی عرب کے النصر فٹ بال کلب کی طرف سے کھیل رہے ہیں۔انھوں نے 2025 تک کلب کے ساتھ کھیلنے کا معاہدہ کیا ہے۔وہ اس وقت اپنے خاندان کے ساتھ سعودی دارالحکومت الریاض میں مقیم ہیں۔
