گلاب کی پتیاں ,ہونٹوں کی خشکی

ہونٹ کی تر وتازگی چہرے کی خوبصورتی کو قائم رکھنے کے لیے انتہائی ضروری ہے کیونکہ خوبصورتی کو جانچنے والے سب سے پہلے ہونٹوں کا مطالعہ کرتے ہیں اور اگر آپ نے کسی کے حسن کی تعریف شاعر حضرات سے سنی ہو تو یاد ہوگا کہ وہ گلاب کی پنکھڑی جیسے ہونٹوں کے قصیدے لکھتے ہوئے کوئی پردہ نہیں رکھتے۔ ہونٹوں کا خشک ہونا اور قدرتی گلابی رنگ ختم ہونا ویسے تو ہر موسم کی بیماری ہے اور چونکہ ہونٹوں پر موسمی اثرات سے محفوظ رہنے کے لیے بال اور آئل گلائنڈز نہیں ہوتے اس لیے سردیوں کی خشک ہوا انہیں سب سے زیادہ نقصان پہنچاتی ہے۔اس مضمون میں ہم ہونٹوں کو نرم و ملائم اور گُلابی رکھنے کے چند آسان طریقے ذکر کریں گے جن پر عمل کر کے آپ بھی اپنی شخصیت کو جاذب نظر اور پُرکشش بنا سکتے ہیں۔

ہونٹوں پر زبان نہ پھیریں

ہونٹوں پر بار بار زُبان پھیرنا ایک ایسی عادت ہے جس پر تھوڑی سی توجہ کے بعد قابو پایا جا سکتا ہے اور اس پر قابو رکھنا بہت ضروری بھی ہے کیونکہ بار بار ہونٹوں پر زبان پھیرنا ہونٹوں کو خشک کر دیتا ہے اور اسی خشکی سے ہونٹ پھٹنے لگتے ہیں اس لیے زُبان کو تھوڑا سا قابو میں رکھیں۔

پانی زیادہ پئیں

ہماری جلد کو تروتازہ رہنے کیلئے نمی کی ضرورت ہوتی ہے اور اسی طرح ہونٹ بھی نمی کے بغیر تروتازہ نہیں رہتے اور خشک ہوکر جہاں رنگ بدلتے ہیں وہاں خشک جلد کے کھنچنے سے ہونٹوں کی جلد پھٹتی ہے اس لئے سردی ہو یا گرمی روزانہ کم از کم آٹھ گلاس پانی ضروری پئیں اور اگر آپ واقعی ہونٹوں کو نرم اور گلابی کرنے کیلئے سنجیدہ ہیں تو اس کا خاص اہتمام رکھیں۔

وٹامن بی کی کمی

جسم میں وٹامن بی کی کمی جہاں نظام انہضام کو متاثر کرتی ہے وہاں اس کمی کے باعث ہونٹوں کے کنارے خشک ہوکر پھٹنا شروع کر دیتے ہیں اور ہونٹوں کے کناروں کا ایسے پھٹنا وٹامن بی کی کمی کی بڑی نشانی ہے، وٹامن بی کی کمی سے ہونٹوں کے پھٹنے کے ساتھ ساتھ منھ میں چھالے بھی پڑ سکتے ہیں۔ہونٹوں کو تروتازہ اور پھول کی پتیوں جیسا رکھنے کے لیے وٹامن بی سے بھرپور کھانوں کو اپنی روزانہ کی خوراک کا حصہ بنائیں خاص طور پر مچھلی، مرغی، سرخ گوشت، دودھ، براؤن چاؤل، باجرہ، بادام، سورج مکھی کے بیج، پالک اور سبز پتوں والی سبزیاں اپنی خوراک میں شامل کریں۔

گھریلو ٹوٹکے

اگر آپ کے ہونٹ موسم کی سختی کو برداشت نہیں کر پاتے تو شہد میں لیموں کے چند قطرے شامل کر کے ہونٹوں پر لگانے سے آپ کے ہونٹ فوری نرم ہو جائیں گے اور شہد اور لیموں کا لیپ ہونٹوں پر موسم کے خلاف قدرتی فائر وال کا کام کرے گا۔چونکہ ہونٹوں پر آئل گلائینڈز نہیں ہوتے اس لیے ہونٹوں کی خشکی کو دور کرنے اور ان کی رنگت کو گلابی کرنے کے لیے آپ زیتون، سرسوں اور لونگ کا تیل ہونٹوں پر لگائیں خاص طور پر رات کو سونے سے پہلے انگلی سے تیل کا ہلکا ہلکا مساج کریں۔

ہونٹوں کی صفائی

ہونٹوں کی صفائی ایسے ہی ضروری ہے جیسے جسم کے باقی حصوں کی صفائی ضروری ہوتی ہے آپ اس کے لیے لیموں کا استعمال کر سکتے ہیں کیونکہ لیموں کے اندر قدرتی بلیچ کرنے کی صلاحیت ہے اور یہ ہونٹوں پر پڑے داغ آسانی سے ختم کر دیتا ہے اسکے علاوہ زیتون کے تیل میں شوگر پاؤڈر ملاکر اس سے بھی ہونٹوں کو صاف کر سکتے ہیں۔

تیز روشنی سے بچائیں

سورج کی تیز روشنی خاص طور پر گرمیوں میں جہاں جلد کو نقصان پہنچاتی ہے وہاں ہونٹوں کی رنگت کو بھی گہرا کرنے کا باعث بنتی ہے اور اس سے بچنے کے لیے ایسی روشنی میں ایسے کریم بام یا لوشن جو سورج کی روشنی سے جلد کو متاثر ہونے سے بچاتے ہیں ہونٹوں پر بھی استعمال کر سکتے ہیں خاص طور پر ایلوویرا کے پودے کا چھلکا اتار کر اسے اچھی طرح باریک پیس کر پیسٹ بنا کر ہونٹوں پر استعمال کرنا انتہائی مفید ہے۔