جیل سے واپسی پر جلوس، ویڈیو وائرل — جامع مسجد سنبھل کے صدر اور شرکاء پر مقدمہ درج”

سنبھل:(اردودنیا.اِن/ایجنسیز) جامع مسجد سنبھل کی مینجمنٹ کمیٹی کے صدر ظفر علی کے خلاف پولیس نے جلوس نکالنے پر مقدمہ درج کر لیا ہے۔ یہ جلوس ان کی مرادآباد جیل سے رہائی کے بعد نکالا گیا تھا۔ پولیس کا کہنا ہے کہ جلوس کی ویڈیوز سوشل میڈیا پر وائرل ہونے کے بعد از خود نوٹس لیتے ہوئے کارروائی کی گئی۔

ضلع سنبھل کی کوتوالی میں سب انسپکٹر آشیش تومر کی شکایت پر ظفر علی، سرفراز، طاہر، حیدر اور 50 سے 60 نامعلوم افراد کے خلاف مقدمہ درج کیا گیا ہے۔ ان پر آئی پی سی کی دفعہ 163 کے تحت کارروائی ہوئی ہے۔

ظفر علی کو گزشتہ سال جامع مسجد کے سروے کے دوران ہونے والے تشدد کے ایک کیس میں 23 مارچ کو گرفتار کر کے مرادآباد جیل بھیجا گیا تھا۔ ان پر الزام تھا کہ انہوں نے سازش رچی اور جھوٹا بیان دیا۔ یکم اگست کو ان کی جیل سے رہائی ہوئی، جس کے بعد مرادآباد سے سنبھل تک 40 کلومیٹر طویل جلوس نکالا گیا۔ اس دوران راستے میں کئی مقامات پر ان کا شاندار استقبال کیا گیا، پھول برسائے گئے اور نعرے بازی ہوئی۔

پولیس کے مطابق، اس جلوس میں آتش بازی، نعرے بازی اور بھیڑ جمع کرنے سے امن و امان کو خطرہ لاحق ہوا، جس پر مقدمہ درج کیا گیا۔ ویڈیو وائرل ہونے کے بعد سوشل میڈیا پر اس پر سخت ردعمل بھی دیکھنے کو ملا۔

پولیس نے اس معاملے کو سنجیدگی سے لیتے ہوئے کہا ہے کہ قانون ہاتھ میں لینے کی اجازت کسی کو نہیں دی جا سکتی، چاہے وہ کوئی بھی ہو۔ جلد ہی ملزمان کے خلاف مزید کارروائی کی جا سکتی ہے۔