نئی دہلی 27 اپریل:(اردودنیا.اِن/ایجنسیز)بالی ووڈ کے معروف اداکار سنجے دت نے ’سرکے چنری تیری‘ نامی فحش گانے کے معاملے میں قومی کمیشن برائے خواتین کے سامنے پیش ہو کر معافی مانگ لی۔ گانے کے بول پر خواتین کے وقار کو متاثر کرنے کے الزامات کے بعد یہ معاملہ سامنے آیا تھا۔
قومی کمیشن برائے خواتین نے اس معاملے پر نوٹس لیتے ہوئے سنجے دت کو سمن جاری کیا تھا۔ پیر کے روز وہ ذاتی طور پر دہلی میں کمیشن کے دفتر پہنچے اور اپنا موقف پیش کیا۔ میڈیا سے گفتگو کے دوران انہوں نے کوئی تبصرہ کرنے سے گریز کیا۔
کمیشن کو اس گانے کے خلاف کئی شکایات موصول ہوئی تھیں جن میں کہا گیا کہ اس کے بول معاشرتی اقدار کے خلاف اور خواتین کے لیے نامناسب ہیں۔ سماعت کے دوران سنجے دت نے معاملے کی سنگینی کو تسلیم کرتے ہوئے معذرت کی اور مکمل تعاون کا یقین دلایا۔
اس موقع پر انہوں نے ایک مثبت قدم اٹھاتے ہوئے 50 قبائلی بچوں کی تعلیم کے اخراجات اٹھانے کا اعلان بھی کیا۔ کمیشن نے گانے میں فحاشی کے پہلو پر سخت موقف اختیار کیا تھا، جس کے بعد یہ پیش رفت سامنے آئی۔
گانے میں اداکارہ نورا فتیحی بھی شامل ہیں، جنہیں بھی کمیشن نے طلب کیا ہے۔ گزشتہ سماعت کے دوران ان کے وکیل پیش ہوئے تھے، تاہم کمیشن نے ذاتی حاضری لازمی قرار دیتے ہوئے انہیں آخری موقع دیا ہے۔
یہ گانا فلم "KD: The Devil” کا حصہ تھا اور ریلیز کے بعد سے ہی تنقید کی زد میں تھا۔ کمیشن نے اس موقف کو مسترد کر دیا کہ گانے سے وابستہ افراد اس کے اثرات سے لاعلم تھے۔بڑھتے دباؤ کے بعد اس گانے کو یوٹیوب سے ہٹا دیا گیا ہے جبکہ معاملے کی مزید سماعت جاری ہے۔
