سماجوادی پارٹی کے سینئر رہنما اعظم خان کو جھٹکا Y زمرے کی سیکورٹی واپس لے لیگئی، محافظ بلا لئے گئے

رام پور،14جولائی:(اردودنیانیوز.کام/ایجنسیز) سماج وادی پارٹی کے سینئر رہنما اعظم خان کو ایک اور جھٹکا لگا ہے۔ پہلے اسمبلی کی رکنیت ختم ہوئی اور اب انہیں دی گئی Y کیٹیگری کی سیکورٹی بھی واپس لے لی گئی ہے۔ جس کے بعد ان کی سکیورٹی میں تعینات تین بندوق برداروں اور رہائش گاہ پر تعینات گارڈ کو ہٹا دیا گیا ہے۔ ایڈیشنل ایس پی سنسار سنگھ نے کہا کہ پولیس کو سیکورٹی ہیڈ کوارٹر کے ایس پی سے حکم ملا تھا کہ سابق رکن اسمبلی اعظم خان کی وائی زمرے کی سیکورٹی برقرار رکھنے کا کوئی جواز نہیں ہے، جس کے بعد ان کی سیکورٹی میں تعینات جوانوں کو واپس بلایا گیا ہے۔معلوم ہوکہ 8 نومبر 2022 کو وی آئی پی سیکورٹی فراہم کرنے کے لیے ریاستی سطح کی سیکورٹی کمیٹی کی میٹنگ ہوئی تھی۔

اس میٹنگ میں فیصلہ کیا گیا کہ اب اعظم خان کو سیکورٹی دینے کا کوئی جواز نہیں ہے۔ جس کے بعد محکمہ داخلہ نے رام پور کے ایس پی کو اس سلسلے میں ہدایت دی تھی۔ جس کے بعد اعظم خان کی سیکیورٹی میں تعینات تمام گنرز اور گارڈز کو واپس بلالیا گیا ہے۔غور طلب بات یہ ہے کہ ایس پی لیڈر اعظم خان کی مشکلات کم ہونے کا نام نہیں لے رہی ہیں۔ نفرت انگیز تقاریر کے پہلے کیس میں سزا پانے کے بعد اسمبلی کی رکنیت چلی گئی۔ اس کے بعد ایک اور نفرت انگیز تقریر کیس میں فرد جرم عائد کر دی گئی ہے جب کہ بیٹے عبداللہ اعظم کے جعلی برتھ سرٹیفکیٹ کیس کی سماعت بھی آخری مرحلے میں ہیں۔ ایسے میں کئی قانونی مسائل میں پھنسے اعظم کا راستہ آسان نظر آتا ہوا نہیں دیکھائی دے رہا ہے۔