نئی دہلی ، 31 مئی:(اردودنیا.اِن/ایجنسیاں) منطقہ قومی راجدھانی این سی آر میں گرج چمک کے ساتھ طوفان، بارش اور 100 کلومیٹر فی گھنٹہ کی رفتار سے چلنے والی ہواؤں نے کل شام دہلی کو ہلا کر رکھ دیا، جس سے لاتعداد درخت اکھڑ گئے اور ٹریفک ٹھپ ہو گئی۔ بارش کے باعث دو افراد کے ہلاک ہونے کی بھی خبر ہے ۔ وسطی دہلی کے جامع مسجد کے علاقے میں ایک 50 سالہ شخص کی موت اس وقت ہوئی جب پڑوسی کے گھر کی بالکونی کا ایک حصہ تیز ہوا کے دوران اس پر گر گیا جب وہ اپنی رہائش گاہ کے باہر کھڑا تھا۔
پولیس نے بتایا کہ شمالی دہلی کے انگوری باغ علاقہ میں، ایک 65 سالہ بے گھر شخص جس کی شناخت بشیر بابا کے نام سے ہوئی ہے، پیپل کا درخت گرنے سے اس کی موت ہو گئی۔محکمہ موسمیات کے ایک اہلکار نے بتایا کہ 2018 کے بعد دہلی میں شدید شدت کا یہ پہلا طوفان ہے۔ گزشتہ پیر کو شہر میں ایک درمیانی گرج چمک کا طوفان آیا تھا۔ ہوائی اڈے کے قریب پالم آبزرویٹری کے ریڈنگ کے مطابق درجہ حرارت میں تیزی سے 13 ڈگری سیلسیس اور جنوبی دہلی کے صفدرجنگ میں 16 ڈگری سیلسس کی کمی واقع ہوئی۔
فیروز شاہ روڈ، کوپرنیکس روڈ، کے جی مارگ، اور پنڈت روی شنکر شکلا لین کے قریب کے علاقوں میں موسلادھار بارش کے بعد گاڑیاں پھنسی ہوئی تھیں۔دہلی کے مشرقی اور وسطی حصوں میں طوفان کا سب سے زیادہ نقصان ہوا جس نے درختوں کی ٹوٹی ہوئی شاخوں سے ٹریفک متاثر ہوئی- حکام کو درخت گرنے کی 300 کے قریب کالیں موصول ہوئیں۔
