‘شیواجی مہاراج نے سورت کو لوٹا’ بی جے پی لیڈر نارائن رانے

ممبئی،3ستمبر :(اردودنیانیوز.کام/ایجنسیز) ’اپنے ہی گراتے ہیں نشیمن پہ بجلیاں‘ یہ شعر اس وقت شیواجی پر منطبق ہوا ،جب شیواجی کے مجسمہ کے انہدام کے بعد افراتفری کے درمیان بی جے پی لیڈر نارائن رانے کے شیواجی پر بیان نے ہلچل مچا دی ہے۔ نارائن رانے نے اپنے ایک بیان میں کہا کہ میں کوئی مورخ نہیں ہوں، لیکن جتنا میں نے مورخ بابا صاحب پورندرے سے پڑھا، سنا اور جانا ہے۔ شیواجی نے سورت کو لوٹا تھا۔میڈیا سے بات کرتے ہوئے نارائن رانے نے کہا کہ انتخابات قریب ہیں، اس لیے اپوزیشن شیوا جی کے مجسمے کو گرانے کے معاملے کو ہوا دے رہی ہے۔

اپوزیشن اس معاملہ پر سیاست کر رہی ہے جو کہ سراسر شرمناک ہے۔ انہوں نے یہ بھی کہا کہ شرد پوار کو آگے آکر امن کی اپیل کرنی چاہئے تھی۔آپ کو بتا دیں کہ ریاست کے ڈپٹی سی ایم دیویندر فڑنویس نے کہا تھا کہ اس وقت کے وزیر اعظم جواہر لال نہرو نے اپنی کتاب ڈسکوری آف انڈیا میں چھترپتی شیواجی مہاراج کو یہ دکھا کر غلط بیان کیا تھا کہ انہوں نے سورت کو لوٹا تھا، لیکن حقیقت میں یہ سچ نہیں ہے۔اس کے ساتھ انہوں نے یہ بھی کہا کہ ملک کی آزادی کے بعد کانگریس نے جان بوجھ کر سکھایا کہ سورت کو شیواجی نے لوٹا تھا، جب کہ حقیقت یہ ہے کہ شیواجی نے سوراجیہ کے لیے خزانہ لوٹا تھا۔ انہوں نے یہ کام قومی مفاد کے لیے کیا۔