فوائد و مجربات-سویا

گردہ و مثانہ کی پتھری کو توڑنے اور آنتوں کی ریاح کو خارج کرنے کے لئے ہیں

15/04/2023Last Updated: 15/04/2023

5 minutes read

مختلف نام: عام نام ہندی اور اردو سویا، سنسکرت شت پشیا، عربی اور فارسی میں شبت، سندھی میں سوا، گجراتی میں شیپ اور سووا بنگالی میں شلنا شونوا سووا اور شپھا کشمیری میں سوئی سنسکرت میں شرئبا اور انگریزی میں ڈل soya dill کہتے ہیں لاطینی میں(Anthi Fructus) کہتے ہیں۔بہت سے اطباء انیسوں اور سوئیکو ایک ہی تصور کرتے تھے بعد میں ان میں تفریق کی گئی۔

شناخت: اس کا پودا سونف کے پودے کی طرح چھتر دار مخصوص خوشبو والا اور لگ بھگ ایک گز اونچا ہوتا ہے پتے سونف (بادیاں)کے مشابہہ اور پھول گچھے دار زرد اور سفید ہوتے ہیں ان پھولوں میں تخم ہوتے ہیں جو تخم شبت کے نام سے موسوم کئے جاتے ہیں اور زیادہ تر تخم کا استعمال کیا جاتا ہے۔ سوئے کی بوٹی یعنی تازہ سوئے کے پودے سے کم فائدہ اٹھایا جاتا ہے اور اسے عموما ًصرف بطور سبزی استعمال کیا جاتا ہے حالانکہ اپنے منافع میں یہ عجیب الاثر ہے تخم سے قبل بوٹی کے متعلق کچھ اظہار کرنا پہلے بہتر ہے۔

مقام پیدائش: ہندوستان وسطی و جنوبی یورپ

مزاج : گرم خشک درجہ دوم بعض کے نزدیک گرم خشک درجہ اوّل

مقدار خوراک: 10سے 15 گرام تک

فوائد: اس کے پتے کا سرریاح،مفتت سدد،ہا ضم،دافع پیچش سردی کے دردوں کو مفید خشک کھانسی دور کرنے نیز گردہ و مثانہ کی پتھری کو توڑنے اور آنتوں کی ریاح کو خارج کرنے کے لئے ہیں۔ مسکن درد اور محلل اورام ہیں۔ یونانی اطباء سونے(نیند) کے لئے اس کی ٹوپی بناکر مریض کے سر پر رکھتے تھے۔ اگر سوئے کے پتوں کو روغن کنجد میں ٹکیہ بناکر پھوڑوں کو باندھیں تو ان کے دردوں کو کم کرتا،پکاتا اور مادے کو خارج کرتا ہے۔ یہ مدربول اور مدر ایام بھی ہے۔ قبض کو دور کرتا ہے۔ اگر گوشت کے ساتھ ملا کر پکایا جائے تو اس کو جلدی ہضم کر دیتا ہے۔ ذیابیطس شکری کے لئے مفید ہے۔ ایک مریض آٹھ نو ماہ سے ذیابیطس شکری میں مبتلا تھا اس کے پاؤں کی انگلی پر زخم ہو گیا تھا ڈاکٹروں نے آپریشن کرکے انگلی کاٹ دی تین ماہ سے زیادہ عرصہ تک پاؤں کے زخم کا ڈاکٹری علاج ہوتا رہا کوئی فائدہ نہ ہوا اور زخم مندمل نہ ہو سکا اسی دوران میں ایک بابا سنیاسی تشریف آئے۔ انہوں نے کہا کہ آپ تازہ سوئے کا رس نکال کر 50 گرام صبح اور 50 گرام شام استعمال کریں۔ آپ کی شکر بالکل ٹھیک ہوجائے گی۔

اس نے ایک ہفتہ استعمال کی مدت بتائی تھی مریض نے یہ رس گیارہ دن پیا اور آپ کو حیرت ہوگی کہ تیسرے ہی دن شکر پیشاب میں بہت کم ہو گئی اور اب وہ بالکل ٹھیک ہے۔ جراح کے علاج اور سوئے کے استعمال سے زخم مندمل ہو چکا ہے مریض نے دو تین بار چینی بھی کھائی ہے چاول بھی استعمال کئے ہیں۔

مگر شکر کا تناسب’’طبعی حالت میں رہا ہے۔ سوئے میں تریاقیت بھی پائی جاتی ہیں۔ ضعف معدہ، ہچکی،جگرو طحال کو مفید ہے قولنج کا مانع اور فساد غذا کا دافع ہے اگر کان میں ورم اور درد ہو تو اس کے پانی کو تیل میں خشک کرکے وہ تیل کان میں ڈالا جائے تو بہت مفید ہوگا۔
سوئے کے بیج

شناخت: یہ چھوٹے چھوٹے چپٹے بیضوی6/1 انچ لمبے اور 8/1 سے 12/1 انچ چوڑے بیج ہوتے ہیں ان کا کنارہ جھلی کی مانند پتلا اور بیج دو حصوں پر منقسم ہوتا ہے اور ہر حصہ پر خطوط ہوتے ہیں رنگ بھورا، بو اور ذائقہ تیز لیکن خوشگوار ہوتا ہے ان کی قوت دو برس تک قائم رہتی ہے۔

مزاج: گرم و خشک دردجہ سوم۔ فوائد: محلل ریاح مدر بول اور ایام ہے۔ بطور جوشاندہ قے آور شہد کے ہمراہ بواسیر اور مقعد کے امراض میں مفید ہے، ہچکی اگر امتلاکی وجہ سے ہو تو اس میں فائدہ کرتا ہے۔ قلت لبن اور مثانہ، خصیوں اور امراض رحم میں مفید ہے عسر بول کو دور کرتا ہے۔ زخم کو خشک کرتا ہے۔ اگر اس کے جوشاندہ سے بھپارہ لیا جائے تو زکام کے لئے مفید ہے۔ اگر ان کو پیس کر روغن کنجد کے ہمراہ تیل بنا کر استعمال کریں تو وجع المفاصل کو فائدہ دیتا ہے۔

کھانا کھانے کے بعد اگر اس کا استعمال کیا جائے تو کھانے کو ہضم کرتا ہے اور ریاح پیدا ہونے سے بچاتا ہے۔ اس کے بیجوں کو باریک پیس کر ہم وزن کھانڈ ملا کر دودھ کے ہمراہ بچے والی عورت کو دیا جائے گا تو اس کا دودھ بڑھ جائے گا۔

زچگی کے ایام میں جوشاندہ یا خیساندہ دیا جائے تو دل کے لئے مفید ہے۔ اگر کھانڈ ملا ہوا سفوف دودھ کی لسی کے ہمراہ پھانکا جائے تو پیشاب آور ہے اگر ارنڈی کے تیل میں جلا کر زخموں پر چھڑکا جائے تو پرانے اور گندے زخم جلدی مندمل ہو جاتے ہیں۔ اس کا عرق بچوں کے نفح کے لئے بہت مفید ہے۔

مضر: گرم مزاج والوں کو اگر کافی دنوں تک اس کا استعمال کرایا جائے توضعف دماغ اور ضعف بصر ہو جاتا ہے۔ یہ گردے اور مثانے کو کمزور اور منی کو خشک کرتا ہیمصلح: لیموں اور ترشیاں سرد مزاج والوں کے لئے شہد،لونگ اوردار چینی وغیرہ۔

مقدار خوراک: سات گرام تک

سنسکرت میں اس دوا کا نام ستاپشپی(Sata Pushpi) ہے اس کے پھل تخم سویا پیٹ سے ہوا خارج کرنے والے اور ہاضمہ کو بڑھانے والے ہوتے ہیں اور اس کا تیل پیٹ سے ہوا خارج کرنے والا ہے۔ بچوں کیلئے خاص طور پر مفید ہے ۔ یہ بھارت بھر میں پایا جاتا ہے۔

2۔ انڈین فارما سیوٹیکل کو ڈیکس I.P.C.بھارت سرکار کے سرکاری طبی گزٹ میں صفحہ 16 پر دوا کے متعلق درج ہے کہ اس کا اثر اس کے اندر موجود تیل پر انحصار رکھتا ہے یہ مخرج باد اور ہاضمہ بڑھانے والا ہے۔ بچوں کے پیٹ پھولنے اور بدہضمی میں مفید ہے اور یہ بطور عرق سویا استعمال ہوتی ہے، گرائپ واٹر گرائپ مکسچر اور گرائپ الیگزر کا بھی جزو ہے۔

سویا کا استعمال ضروری ادویات اور آیوروید ویونانی پرانے وقتوں سے ہو رہا ہے کئی ممالک میں زچہ عورت کی ہاضمہ کی قوت اور دودھ بڑھانے کے لئے اور کھانا کھانے کے بعد منہ میں خوشبو پیدا کرنے کے لئے سویا کھلانے کا رواج ہے۔ بچوں کے پیٹ درد دست ہچکی وغیرہ میں اس کا عرق دیا جاتا ہے یہ عرق ہاضمہ کو بڑھاتا ہے اس کے خاص مجربات درج ذیل ہیں۔

پیٹ درد

ہاضمہ کی خرابی ہونے سے کھانا کھانے کے دو تین گھنٹے بعد پیٹ درد ہوتا رہتا ہوتو کھانا کھانے پر منہ صاف رکھنے کے لئے سویا چباتے رہیں اور رات کو سونے سے پہلے بھی سویا لے لیں اس طرح تھوڑے دن تک کرتے رہنے سے اپھارہ اور پیٹ کا بھاری پن و پیٹ درد دور ہوجاتا ہے اور پاخانہ بھی کھل کر آتا ہے۔

چھاتیوں کی خرابی

پر سوت کے روز سے دو تین بار پانچ پانچ گرام سو یا کھلاتے رہیں۔ دودھ کا نقص بھی دور ہو گا۔ دودھ بچے کو باآسانی ہضم ہوجائیگا۔ علاوہ ازیں جن ماؤں کا دودھ کم ہوتا ہے ان کے دودھ میں بڑھوتری ہو جاتی ہے۔

دودھ کی کمی

سویا کے بیج 25گرام چینی 25 گرام۔ دونوں کو پیس لیں اور ماں کو 6 گرام صبح اور 6 گرام شام نیم گرم دودھ سے دیں۔ اس سے عورتوں کے پستانوں میں دودھ بڑھتا ہے۔ بچہ ہونے کے بعد اس کے بیجوں کا جوشاندہ بنا کر کھلانے سے بھی زچہ عورت کے دل کو طاقت ملتی ہے اورزچہ عورتوں کے لئے یہ ایک قیمتی چیز ہے۔

یونانی گرائپ واٹر

سویا آدھا کلو، کشمش آدھا کلو، پانی پانچ کلو ان کا چار بوتل عرق نکالیں اس میں دس گرام سوڈا بائیکا رب ملا ئیں۔ پھر اس عرق میں شہد یامصری میٹھا کرنے کے لئے ملا دیں بچوں کی بدہضمی پیچش،مروڑ،ہرے پیلے دست،کھانسی اور آنتوں وغیرہ کی تکلیف کے لئے ازحد مفید ہے گرائپ واٹر کی طرح ایک چھوٹا چمچہ صبح ایک چھوٹا چمچہ شام کو دیں۔