سماجوادی لیڈر اعظم خان کو ضابطہ اخلاق کی خلاف ورزی کیس میں ملی بریت

رامپور، 28 اگست :(اردودنیانیوز.کام/ایجنسیز)یوپی کے ضلع رامپور کی ایک خصوصی عدالت نے سماج وادی پارٹی (ایس پی) لیڈر اعظم خان کو امید وار رہتے ہوئے ووٹروں کو متاثر کرنے کے لئے پولنگ سنٹر احاطے میں کار سے پہنچنے کے الزام سے بری کر دیا۔قدآور سماج وادی پارٹی کے قدآور لیڈر اعظم خان پر امید وار رہتے ہوئے ووٹروں کو متاثر کرنے کے لئے ووٹنگ احاطے میں کار سے پہنچنے کا الزام تھا۔ اس معاملے میں ایم پی۔ ایم ایل اے کورٹ نے آج اپنا فیصلہ سنایا۔ فیصلے میں اعظم خان کو بری قرار دیا گیا ہے۔ ضلع میں اعظم خان کیخلاف کئی مقدمے چل رہے ہیں۔ ان میں کئی مقدمات میں وہ بری ہو چکے ہیں تو کچھ میں انہیں سزا ہو چکی ہے۔

اس کی وجہ سے اعظم خان ضلع سیتا پور جیل میں بند ہیں۔ اعظم خان کے سلسلے میں ایم پی۔ایم ایل اے کورٹ مجسٹریٹ ٹرائل نے اپنا فیصلہ سنایا ہے۔خبر کے مطابق سال 2019 میں امید وار رہتے ہوئے اعظم خان اپنی کار لے کر رضا انٹر کالج پولنگ سنٹر میں پہنچے تھے۔ اس وقت کے ایس ڈی ایم پی پی تیواری نے ان کیخلاف ضابطہ اخلاق کی خلاف ورزی کا معاملہ درج کرایا تھا۔ الزام تھا کہ اعظم خان ووٹروں کو متاثر کرنے کے لئے پولنگ بوتھ احاطے میں کار لے کر پہنچے تھے۔ اس معاملے میں تمام گواہیاں اور بحث پوری ہونے کے بعد دستاویزات محفوظ کر کے فیصلے پر لگائی گئی تھیں۔ آج اس میں عدالت کے ذریعہ فیصلہ سنایا گیا، فیصلے میں اعظم کوعدالت نے شواہد نہ ہونے کی بنیاد پر بری قرار دیا ہے۔