پاکستانی خفیہ ایجنسی کیلئے جاسوسی ،وزارت خارجہ میں تعینات ملازم ستندر گرفتار

میرٹھ؍نئی دہلی، 4 فروری:(اردودنیانیوز.کام/ایجنسیز) یوپی اے ٹی ایس نے وزارت خارجہ میں تعینات ایک ملازم کو گرفتار کیا ہے۔ ستندر سیوال نامی اس شخص پر آئی ایس آئی کے لیے کام کرنے کا الزام ہے۔ ستیندر ماسکو میں ہندوستانی سفارت خانے میں تعینات ہے۔ وہ اصل میں ہاپوڑ کا رہنے والا ہے۔ ستیندر 2021 سے ہندوستان کے بہترین سیکورٹی اسسٹنٹ یعنی آئی بی ایس اے کے طور پر تعینات ہے۔آئی ایس آئی کے اس جاسوس پر ہندوستانی سفارت خانے، وزارت دفاع، وزارت خارجہ اور ہندوستانی ملٹری انسٹی ٹیوٹ کی اہم خفیہ معلومات بھیجنے کا الزام ہے۔اے ٹی ایس میرٹھ یونٹ کی پوچھ گچھ کے دوران ستندر نے پاکستان کے لیے جاسوسی کا اعتراف کیا ہے۔

ذرائع کے مطابق یوپی اے ٹی ایس نے میرٹھ سے اس کی گرفتاری ظاہر کی ہے۔ معلومات کے مطابق سیندر سیوال ہاپوڑ کاباشندہ ہے۔اے ٹی ایس ٹیم نے اس کے پاس سے دو موبائل فون، آدھار کارڈ، پین کارڈ اور کچھ دیگر اشیاء برآمد کی ہیں۔ یوپی اے ٹی ایس اب بھی اس سے مزید پوچھ گچھ کر رہی ہے۔ ذرائع کے مطابق یوپی اے ٹی ایس کو کئی جگہوں سے یہ اطلاع مل رہی تھی کہ پاکستانی خفیہ ایجنسی آئی ایس آئی کے کارندے وزارت خارجہ میں تعینات کچھ ملازمین کو ورغلا کر رقم کا لالچ دے رہے ہیں۔ہندوستانی فوج سے متعلق اسٹریٹجک طور پر اہم معلومات چوری کی جا رہی ہیں۔ اس اطلاع کے بعد یوپی اے ٹی ایس کی ٹیم سرگرم ہوگئی اور ستیندر سیوال پر نظر رکھنے لگی۔ جب اس کی جاسوسی کے حوالے سے ٹھوس شواہد ملے تو اسے پوچھ گچھ کے لیے بلایا گیا۔