ون نیشن ون الیکشن بل پر اسٹالن اور ممتا بنرجی کی سخت تنقید

نئی دہلی ،12دسمبر (ایجنسیز) مرکزی کابینہ کی جانب سے ’’ون نیشن ون الیکشن ‘‘بل کو منظور کرنے کے فوری بعد ڈی ایم کے صدر اور تمل ناڈو کے وزیر اعلی ایم کے اسٹالن نے جمعرات کو سخت ردعمل کا اظہار کیا۔ انہوں نے کہا کہ یہ اقدام نہ صرف قومی سطح پر علاقائی آوازوں کو مٹائے گا بلکہ وفاقیت کو بھی ختم کردے گا۔ انہوں نے ایکس پر لکھا کہ مرکزی کابینہ نے پارلیمنٹ میں ’’ون نیشن ون الیکشن ‘‘پیش کرنے کی منظوری دے دی ہے۔

یہ ناقابل عمل اور جمہوریت مخالف اقدام علاقائی آوازوں کو مٹا دے گا، وفاقیت کو ختم کر دے گا اور طرز حکمرانی میں خلل ڈالے گا۔ انہوں نے مزید کہا کہ اٹھو انڈیا! آئیے ہم اپنی پوری طاقت کے ساتھ بھارتی جمہوریت پر اس حملے کا مقابلہ کریں۔وہیں مغربی بنگال کی وزیر اعلیٰ ممتا بنرجی نے بھی ’’ون نیشن ون الیکشن ‘‘ بل کی سخت الفاظ میں مذمت کی۔ ترنمول کانگریس کی رہنما نے کہا کہ ’’ون نیشن ون الیکشن ‘‘ بل آئین کے بنیادی ڈھانچے کو ختم کرنے کیلئے مرتب کیا گیا ہے ۔

انہوں نے کہاکہ ہمارے اراکین پارلیمنٹ اس سخت قانون سازی کی مخالفت کریں گے، بنگال کبھی بھی دہلی کی آمرانہ خواہشات کے سامنے نہیں سرنگوں نہیں ہوگا۔جمعرات کو مرکزی کابینہ نے ون نیشن، ون الیکشن بل کو ملک میں لاگو کرنے کی سفارش کو منظوری دے دی۔ جس کا مقصد مقصد لوک سبھا، ریاستی اسمبلیوں اور بلدیاتی اداروں کے انتخابات کو بتدریج ایک ساتھ منعقد کرنا ہے۔ توقع ہے کہ حکومت پارلیمنٹ کے جاری سرمائی اجلاس کے دوران اس بل کو پیش کرے گی۔