ہنمکنڈہ میں سرکاری اردو اساتذہ کے تربیتی پروگرام کا کامیاب انعقاد

ہنمکنڈہ 2/اگست2022( سید عظیم قریشی)حکومت تلنگانہ کی جانب سے ضلع ہنمکنڈہ میں پرائمری سطح پر اردو میڈیم اساتذہ کرام کا سہ روزہ تربیتی پروگرام گورنمنٹ گرلز ہائی اسکول پٹرول پمپ، ہنمکنڈہ میں 30 جولائی سے 2 اگسٹ 2022 تک منعقد ہوا۔ جناب اے سری نواس ڈسٹرکٹ کوارڈینیٹر نے پروگرام کے آخری دن آج تربیت حاصل کرنے والے اساتذہ کو مخاطب کرتے ہوئے کہا کہ اس تربیتی پروگرام کا مقصد پرائمری سطح پر طلباء کے معیار تعلیم کو بڑھانا ہے، خصوصا وبائی مرض کورونا کی وجہ سے ملک بھر میں مکمل تالہ بندی کی گئی تھی جس کی وجہ سے طلبہ کی تعلیم کا نقصان ہوا اور تعلیمی معیار شدید متاثر ہوا تھا ، لہذا حکومت نے تعلیمی معیار کو بہتر بنانے کی غرض سے (F.L.N) foundational literacy and numeracy بنیادی خواندگی و اعداد شناسی کے نام سے ریاستی سطح پر ٹیچرز کے لئے سہ روزہ تربیتی پروگرام کا اہتمام کیا ہے۔

انہوں نے اساتذہ سےکہا کہ تربیتی پروگرام میں نہ صرف وہ شریک رہیں بلکہ دوران تربیت دلچسپی اور سرگرمی کے ساتھ حصہ لیں، اور بعد تربیت اپنے اسکولوں میں جو بھی سکھایا گیا ہواس کو پوری ایمانداری کے ساتھ روبہ عمل لائیں۔ پروگرام کے آخر میں جناب سید عظیم قریشی ،(اردو پنڈت) نے اپنے تاثرات کا اظہار کرتے ہوئے کہا کہ مکمل تالہ بندی کے بعد طلباء کاجو تعلیمی نقصان ہوا تھا اس کی بھرپائی بہت ضروری تھی اور ایسے ہی پروگرام کی شدید ضرورت محسوس کی جارہی تھی،انشاءاللہ یہ تربیتی پروگرام اساتذہ کے لئے لیے بچوں کے معیار تعلیم کو بہتر بنانے میں معاون رہے گا۔

جناب محمد سلیم احمد(اردو معلم) نے مندوبین کاشکریہ ادا کرتے ہوئے کہا کہ اس تربیت سے اساتذہ کو خاطرخواہ فائدہ ہوگا ۔اس تربیتی پروگرام میں محترمہ آمنہ اختر ، محمد نہال ،محترمہ آسیہ صدیقہ اور جناب محمد صابر الدین نے ڈسٹرکٹ رسورس پرسنس کی حیثیت سے خدمات انجام دیں۔ محترمہ وی پدماوتی اسکول کامپلیکس ہیڈ مسٹرز نے پروگرام کی نگرانی فرمائ اور تمام اساتذہ کو تربیتی پروگرام کے کامیاب اختتام پر مبارکبادی۔